Saipung, Risaw 29
Ka Shnongrim Sports Club bad ka Narwan Sports Club ki la khur jingjop ha ka lympung ïalehkai Super League Football Tournament ïa kaba la pynïaid da ka Saipung Block Sports Association (SBSA).
Kane ka nam jop ka la wan hadien ba ka Shnongrim SC ka la pynliem noh ïa ka Lakasein Sports Club da 2-1 kol bad ka Narwan Sports Club ka la pynliem noh ïa ka Jarain Sports Club da 3-2 kol ha ka jingïakhun kaba la long ha madan ïalehkai Lammyrsiang, East Jaintia Hills District ha ka sngi Saitjaiñ.
Haba phai sha ka jingïakhun ba nyngkong, ka Shnongrim ka la pynliem ïa ka Lakasein SC da 2-1 kol bad ïa ki kol ka Shnongrim la thep da u Samedonhi Sukhlain ha ka minit ba 9 bad u Steady Sutnga ha ka minit ba 18. Katba ïa ka shi kol ka Lakasein la thep da u Pynchait Mukhim ha ka minit ba 46.
Ha ka jingïakhun kaba khatduh jong kane ka sngi, ka Narwan SC ka la pynliem noh ïa ka Jarain SC da 3-2 kol bad ïa ki kol jong ka Narwan SC la thep da u Living Phawa tang hapoh ka minit kaba 2 bad 41, u Meki Suiam ha ka minit kaba 14. Katba ïa ki ar tylli ki kol jong ka Jarain SC la thep da u Romario Dkhar ha ka minit kaba 71 kaba la wan lyngba ka penalty bad u Lack Lamare ha ka minit kaba 78.
Ha ka 30 tarik u Risaw pat ka jingïakhun kan long hapdeng ka Mulait United Football Club pyrshah ïa ka Mynthing SCC ha ka por 11.30 mynstep bad ka Tluh Sports Club kan ïakhun pyrshah ïa ka Lammyrsiang SCC ha ka por 1.30 nohphai sngi.
