Shillong, Risaw 29
U Eddie Nketiah u la ïoh khyrwit ïa ka hat-trick ba nyngkong ha ka lympung Premier League kaba la ïarap ïa ka Arsenal ban jop suk pyrshah ïa ka Sheffield United ha ka jingïalehkai kaba la long ha Emirates Stadium ha ka sngi Saitjaiñ.
Ka Arsenal kam pat shah rem satia ha kane ka aïom ba mynta ha ka lympung Premier League bad da katei ka jingjop ka la kiew sha ka kyrdan ba ar, hadien ba ka la kamai 24 dor-thong na ki 10 tylli ki jingïalehkai.
Haba phai sha ka jingïalehkai, u Nketiah u la ïoh ban khyrwit ïa ka kol ba nyngkong ha ka minit ba 28 bad haduh ba kut ka kylla step, ka Arsenal ka la tam da 1-0 kol.
Haba bteng ïa ka kylla miet, ha ka minit ba 50 u Nketiah u la ïoh ïa ka kol ba ar bad ha ka minit ba 58 u la ïoh ïa ka hat-trick. Ha ka minit ba 80 u Fabio Vieira u la thep ïa ka kol ba saw ka Arsenal kaba la wan lyngba ka penalty bad u Takehiro Tomiyasu u la khyrwit ïa ka kol ba san ha ka minit shwa ban wai ka jingïalehkai.
