Raphael Warjri
Lada ñiew tang ïa ki kyntien ‘Jyn’ bad ‘Jing’ ki dang byllai ba lah ban ai nuksa, hynrei dei ban sngewthuh da ka aiñ pynshong kyntien khnang ban peiphang ki khynnah ki samla pule ne kino kino ki nongthoh. Ym pat ju shem ban don ba thoh ïa kane ka phang ha kaba ïadei bad ka rukom thoh ïa ka ktien Khasi, kumta yn pyrshang ban batai katkum ba lah ban sngewthuh ha ka rukom kaba ryntih. Lehse lah ban don napdeng ki stad tip ïa ka saiñktien ne ïa ka ktien Khasi kiba la dep thoh hashwa, hynrei haba ym pat ju shem mynno mynno ruh, kumta yn pyrshang ban pynbit pynbiang katba lah ban kot pyrkhat na lade. Lada dei ban pdiang ne kyntait ka shong ha ka iktiar kaba dei na ki shlem pule ne na ka sorkar.
Ka don ka jingbatai da ki katto katne ki nongthoh ba kine ki ktien ‘Jyn’ bad ‘Jing’ ki dei ki ktien rapkhmat ba dei ban pyndonkam shwa kano kano ka ktien kiba thew ïa ka jingmut pura katkum kata ka kyntien kaba bud ryngkhi. La batai ba ka kyntien ‘jyn’ ka thew ïa ki ktien ba long met long pasoh; hynrei ka ktien ‘Jing’ ka kdew ïa ktien ba sngew ha dohnud ne mut ha janor. La ai ki nuksa kum jynbam, jyntap, jynthoh, jynthiah bad kum jingieit, jingkmen, jingjot, jingsniew bad kumta ter ter. Haba bishar ïa kane ka jingbatai, ka long kaba ym pat pura namar ba dang don katto katne kiba dang mala hangne hangtai. Lada shim kum kata ka jingbatai ka kdew ba ka ktien ‘Jynjar’ kam ïahap tar ha kane ka liang, kumjuh ruh ka ktien ‘Jingput’ kaba lah ban thew ar jingmut, kawei ïa ka tiar put bad kawei ia ka sur put. Kum ka nuksa, ‘Ka tangmuri ka dei ka jingput tynrai Khasi kaba nylla’ bad ‘Ka jingput sur jong u duhalia ka long kaba sngewphieng’. Na kata ka daw la donkam da ka rukom batai kaba kham skhem ka nongrim bad kaba ryntih ïa kino kino ki ktien ha u sup u thiar ki ktien Khasi.
Kumta yn pyrshang ban jurip sani ïa ki ktien kiba dawa ban bynrap ki ktien rapkhmat ‘Jing’ bad ‘Jyn’ bad ban bishar sani ïa ki kyntien ba long shitylli kiba sdang na ka kyntien ‘Jyn’ kumba la kdew kham hashwa. Ki ktien jynjar, jyntah, jynduh, jyndong, jynrat, jynreiñ, jynsur, jynthet, jyntang, jyntep, jynhaw, jynthew, jyntem, jynthoh, jynthaw, jynthung bad kumta ter ter. Kine ki ktien ba la jer ki dei kiba la biang kumta ba ym dei ban thoh da kumwei, hynrei dang don pat kiba thoh ‘Jing’ kum ïa ka jingtep, jinghaw, jingthew, jingtem, jingthoh, jingthung ha kaba la pynkulmar ïa ka thoh ka tar. Kumta dei ban buh ryntih khnang ban ym bakla shuh hadien habud. Ha kajuh ka rukom lah ban kdew shai ba da lei lei ruh ym lah pat ban thoh jingduh ïa ka ktien jynduh namar ba ïapher ka jingmut. Ka ktien jingduh dei ba sepei ne bijai, katba ka ktien jynduh jyndam ka dei ba lah lyndet ne klet syndon. Ki ktien ba bud ryngkhi ïa ka ktien jynduh lei lei ki long kiba ym long ban buh ktien rapkhmat ‘Jing’ namar kim kit jingmut eiei ruh. Ym lah ban ong ‘Jingreiñ’ ïa ka khñiang jynreiñ lane ‘Jingrat’ ïa ka ktien jynrat na dyngkhong bad kumta ter ter. Kumta ka ktien rapkhmat ‘Jing’ bad ‘Jyn’ kim don kaei kaei kaba ïasnoh bad ki ktien ba shitylli kum Jynreiñ, Jynrat, Jynsur, Jyntang bad kiwei kiwei kiba kum kita.
Ka don sa kawei pat ka jingbatai na ki stadtip saiñktien (linguist) kaba la shah mana tyngeh ba ym dei ban thoh ‘Jyn’ namar ba baroh ki dei ‘Jing’ haduh ba ym shlan shuh ban aireng haba la hukum da ka iktiar na ka salonsari. Phewse, ha la marwei la shu rymmuiñ ban puson ba kumno yn thoh noh Jingreiñ ïa ka khñiang Jynreiñ, Jingrat ïa kaba Jynrat, Jingsur ïa kaba Jynsur, Jingtang ïa u Jyntang, Jingjar ïa kaba Jynjar ba suhsat, Jingdem ïa ka Jyndem ka sapoh, Jinglat ïa ka doh Jynlat, Jingshoh ïa u Jynshoh, Jingdong ïa kaba Jyndong bad kumta ter ter. Ka long kaei kaei kaba thamula ba ki stadtip na ki salonsari ki phong ïa ka pansngiat bad ki shongkhet ha ki salonsari khlem da kitkhia bad kitkhlieh ban sngewthuh janai ïa la ka ktien kmie bad sa batai stad thurmur na parin ba rasong ha ka shlem kaba dei ban saiñ ban phrang shwa ban khlei ki juban ha rynsan paidbah. Kumta ki paidbah ki dei ban husiar ba ym dei ban shaniah than ha kita ki stadtip kiba jyndong ka jingtip bad pyrshang pyn-tian jubor da kaba bakla ïa ki pateng bynriew ha ka lawei.
Kum ha kane ka khep ba ka jingdawa ban ioh jingthuh ha ka khyrnit baphra jong ka Riti Synshar Ri India, la dei ban da phikir shuh shuh ban pynbiang kum ïa kita kiei kiei kiba kongsan ha ka ktien Khasi. Lada kita ki ba ki paidbynriew ki peit lynti bad sien syntiew ban kyntiew ïa ka kyrdan bad ka dor jong ka ktien Khasi ki long syntan, ka long kaba synjor bad syier mynsiem ban ïeng rasong ka daw. Kumta ka daw ka dawa ba kita kiba bat ïa u lakam na ka bynta ban ñiah kynjai sha ka thong da ka jingtip bad jingshemphang kaba bniah bad janai. Ka long kaei kaei kaba donkam ban tih jylliew bad tai sani ïa kiei kiei kiba dei ki snap tynrai jong ka jaitbynriew da kaba pyiar la ki ksang kti sha kita ki riew shemphang kiba shitrhem ha ka daw, khlem da leh ba ym suitñiew tang na ka daw ba ki don napdeng kita ki riewshemphang kiba ym pat biang ka jingnang jingstad ha ka jingpule na ki shlem hikai kiba ha la ki kyrdan kyrdan.
