Shillong, Risaw 09 (UNI)
U Myntri Rangbah ka Jylla Conrad K Sangma ha ka Sngi U Blei u la pynrem ïa ki jingbthei ha ka jingïalang ka kynhun Khristan ha Kerala kaba la ïalam sha ka jingïap jong 2 ngut ki briew bad jingmynsaw jong 50 ngut kiwei pat.
Ki jingbthei ki la jia ha ka Jehovah’s Witness Convention; ka kynhun Khristan kaba la mih na Amerika ha ka spah snem kaba 19.
Ha ka rynsan lad pathai X, u Myntri Rangbah u la ong, “Ka jingpynrem jur ïa ki jingbthei bom kiba la jia katba dang ïaid ka jingïalang duwai ha Ernakulam, Kerala kaba la ïalam sha ka jingduh jong ki mynsiem briew bad kaba la pynmynsaw ïa kiba bun. Kiba kum kine ki jingleh donbor bad jingisih kim dei ban ïoh jaka ha ri jong ngi. Nga kyrpad ïa ki bor ba dei khmih ban ïaid shakhmat bad ka jingtohkit bad pynshitom ïa kito kiba donkti. Ka jingkner ïa ki jingsngewlem sha ki longïing kiba la duh noh ïa kiba ieid kiba thoiñ bad ngi duwai ruh na bynta kito kiba mynsaw.”
Kum ban shu kdew hangne, ar ngut ki briew ki la khlad ha ka Sngi U Blei na ka jingbthei bom ha ka jingïaseng duwai ka Jehovah’s Witnesses ha Kerala. U briew uba la kam ba u la donkti ban pynbthei bom, ïa uba la tip kyrteng kum u Dominic Martin, u la leit ban aiti ïalade ha ki pulit.
Kane ka jingbthei jong kumba lai tylli ki bom ka la long ha ka jaka ba la tip kum ka Kodakara.
Ka Myntri ka tnat ka koit ka khiah ka Sorkar Kerala, ka Veena George, ka la ïathuh ba kawei ka briew ba la tip kyrteng kum ka Kumari, 56 snem ka rta, na ka shnong Thodupuzha, ka la khlad na ka jingkem ding ha ka met jong ka. Nalor ka Kumari, ka don sa kawei pat ka briew kaba la khlad.
“Na ki 52 ngut ki briew kiba la mynsaw jur bad ba la ïalam sha ki Hospital bapher-bapher, 30 ngut ki dang don hapdeng ka jingshah sumar,” la ïathuh ka Myntri.
Ka la ong ruh ba ki don 18 ngut kiba don hapdeng ka jingshitom jur. Na kine, 6 ngut ki don hapdeng ka jingma kaba khraw.
Ha kaba ïadei bad kane ka jingjia, uwei u briew ïa uba la tip kyrteng kum u Dominic Martin, 48 snem ka rta, u la leit pyndem hakhmat ki pulit ka thanat Kodakara, bad u la phla ba u la buh ïa ki bom IED (Improvised Explosive Device) ha ka jaka ba la pynlong ïa ka jingïaseng duwai jong ka Jehovah’s Witnesses ha Kalamassery. Une u Dominic Martin u dei na Thammanam kaba don ha Kochi.
Ki tyllong khubor ki ïathuh ba u Dominic Martin u la ai da ka ‘Live Video’ ha ‘Facebook’ kumba lai kynta shuwa ba un leit aiti ïalade hakhmat ki pulit.
Ha kata ka dur-khih lane ‘video’, u Dominic Martin u la shim ïa ka jingkitkhlieh halor ka jingpynbthei ïa kitei ki bom, bad u la pynbna ba un leit sha thanat ban aiti ïalade.
Une u briew u la ong ruh ba ki lad pathai khubor kim dei ban pyni kumno kata ka jingbthei ka la jia. Hadien ba u la pynmih ïa katei ka dur-khih, ka sla jong u ha ‘Facebook’ ruh ka la jah noh.
U Dominic Martin u la ïathuh ba u dei u dkhot ka Jehovah’s Witnesses ha ki snem kiba la leit noh, bad u la kam ba u la tip ba kane ka kynhun ka la pynsaphriang ïa ki jingtip ba bakla ha ka imlang-sahlang.
U la ong ba u ngeit ba ka Jehovah’s Witnesses ka la pynsaphriang ïa kiei-kiei kiba ïalam bakla. Ha kata ka dur-khih, la ong ba ka jingpynbthei bom ka dei ka jingleh pyrshah ïa ka jingpynsaphriang ïa ki jingtip kiba bakla jong ka Jehovah’s Witnesses. U Dominic Martin u la kam ba ka Jehovah’s Witnesses ka khlem hikai ïa u ban rwai ïa ka jingrwai ieid ri (National Anthem).
Ki pulit ki la ong ba ïa kita ki bom IED la song ha ki ‘tiffin’ ja bad la buh hapoh ka jaka ba la pynlong ïa ka jingïaseng duwai.
