Kohima, Risaw:
U Myntri jong ka Nagaland uba dei khmih ïa ka tnat Jngoh-kai Pyrthei bad Pule-Dangle u Temjen Imna Along u la buh ka jingkyrpad ïa ka seng Eastern Nagaland People’s Organisation ba kim dei ban pep ban ïashim bynta ha ka Hornbill Festival 2023.
Ha ka jingïakren bad ki nongthoh khubor, u Myntri ba dei khmih ïa ka tnat ki kam jngohkai pyrthei u la ong, “Nga ruh nga dei u Naga kumba long lang kiwei pat ki para Naga ha ka bynta ba shaphang Mihngi jong ka jylla bad nga buh ka jingkyrpad ïa ka seng jong ki Naga, ki longïing kiba don ha ka bynta ba shaphang Mihngi jong ka jylla, ki hynmen para kynthei bad shynrang ba ka Hornbill Festival ka dei ka jingrakhe lehkmen jong ki Naga jong ka Nagaland. Ka dei ka kamram jong ngi na ka bynta ban pynpaw ïa ka jingïatylli lyngba kane ka Hornbill Festival ha ryngkat ka jingpynpaw ïa ka jinglong tynrai. Namar kata nga buh ka jingkyrpad sha ki Naga jong ka bynta ba shaphang Mihngi jong ka jylla ba ki dei ban mih shakhmat bad ban ïashim bynta ha kane ka jinglehkmen.”
Ka Hornbill Festival ka long kawei na ki jinglehkmen ba paw jong ka Nagaland, ha kaba la ju rakhe man u snem naduh ka 1 tarik, haduh ka 10 tarik, Nohprah.
Kawei pa kawei ka kynhun jait bynriew ne ka kynhun hapoh jong ki ha ka jylla ki don la kijong ki rukom ban pynpaw ïa ka kolshor jong ki.
