Imphal, Risaw:
U Myntri uba dei khmih ïa ka tnat pule-puthi ha Manipur u Thounaojam Basantakumar Singh ha kine ki khyndiat sngi ba la lah u la ong ba na ki 15,915 ngut ki khynnah pule kiba sah ha ki 347 tylli ki jaka sah ba shipor, 15,641 ngut ki dei kiba la shah pynrung biang na ka bynta ban bteng ïa ki jingpule ha ki skul ba marjan.
U Thounaojam ha ka jingïakren bad ki nongthoh khubor u la ong ba haba ki jingïakynad ki la sdang ha ka jylla ha ka 3 tarik, Jymmang, ki skul ki la khang lut na ka bynta ka aïom lyiur, ha kaba hadien kane ki jingïakynad ki la nang jur bad nang bteng.
“Ki klas 1 haduh klas 8 ki la sdang ban plie biang naduh ka 5 tarik, Naitung katba ki klas kiba kham shaneng ki la sdang ha ka 10 tarik, Nailar,” u la ong.
U Myntri u la ong ba kumba ka long haduh ka 23 tarik, Risaw, ka jingdon jong ki khynnah kiba leit skul ka la long da 77 per cent.
“Ha baroh, 26 tylli ki skul, ki la don kumba 18 tylli ha Churachandpur bad mar lai tylli ha Imphal East bad Jiribam distrik ïa ki bym pat plie haduh mynta ha kaba kine ki skul ki dang shah pyndonkam kum ka jaka sah ba shipor jong ki lanot bad don ruh ïa kiba dang pynsah ïa ki pulit jong ka tnat Central Armed Police Forces.”
Ha kaba ïadei bad ka jingjam shakhmat ha kaba ïadei bad ki jingpyntreikam na ka bynta ka jingmyntoi jong ki khynnah pule, u Thounaojam u la ong, ” Ïa ki khynnah la pynrung biang ha ki skul ba marjan ha kaba la pyllait ei nadong shadong. Ki Nodal Officer ki la shah thung na ka tnat School Education Department ban pyntikna ha kaba ïadei bad ka jingpyllait em ka bai rung skul bad ban pynbiang ïa ki kot pule, ki kot thoh, ki tiar pyndonkam bad ki Uniform skul na ka bynta ki khynnah.”
La dep ban ai ïa ki Identity Card sha ki khynnah ki bym don jaka sah shuh bad baroh ar kata ka Board of Secondary Education of Manipur bad ka Council of Higher Secondary Education Manipur ki la ïatreilang na ka bynta ban pynbiang ïa ki kot ki sla bad ki syrnot ïa kiba la duh noh jong kine ki khynnah skul ha ka por ba la jia ka jingïakynad, u la ong.
