Colombo, Risaw
U Myntri ka tnat Bar Ri jong ka Sri Lanka, u Ali Sabry u la iathuh ba ka Kynhun Myntri jong ka Sri Lanka ha kane ka por ka la pynbna ia ka rai jong ka sorkar ban sam ‘Visa’ ei (Free Visas) sha ki paidbah nongshong shnong jong 6 tylli ki ri kynthup ia ka India.
U Sabry u la iathuh ba kane ka rai jong ka sorkar Sri Lanka kan treikam haduh ka 31 tarik u Lber, 2024.
Kitei 6 tylli ki ri kiba ka Sri Lanka kan sam ei ia ki ‘Visa’ sha ki paidbah nongshong shnong ki kynthup ia ka India, China, Russia, Malaysia, Japan, Indonesia bad ka Thailand bad kane kan sdang treikam noh shen.
Kumta, la ong ba ki paidbah nongshong shnong na kitei ri ba la buh, kin ioh ia ki ‘Visa’ hadien ba ki leit poi sha Sri Lanka, khlem da donkam ban siew eiei.
Namar kumba la tip ba ka India ruh ka long ka nongkyrshan ba ratbah ia ka kam jngoh kai pyrthei jong ka Sri Lanka.
Katkum ka jingbuh jingkheiñ jong ka tnat ba dei khmih ia ka kam jngoh kai pyrthei jong ka ri Sri Lanka, ha u Nailur ba la leit, ki la don haduh 30,000 tam ki nong India kiba leit jngoh kais ha Sri Lanka bad kane ka long kumba 26% na ka jingdon ki nong India kiba leit kai sha Sri Lanka hapoh jong utei u bnai. Katba na China pat ki don haduh 8,000 tam ki nongleit jngoh kai pyrthei kiba la leit sha Sri Lanka ha utei u Nailur.
Hynrei la ong ba ka kam jngoh kai pyrthei hapoh Sri Lanka, ka la sdang hiar naduh u snem 2019 hadien ka jingshah pynbthei bom ha ka sngi ‘Easter Sunday’, kaba la shim ia ka jingim jong 270 ngut ki briew, kynthup ia 11 ngut ki nong India bad kumba 500 ngut pat kiba mynsaw ha katei ka jingjia.
Ka Sri Lanka, kaba la sakhi ia ka jinghiar ha ka ioh- ka kot naduh ki snem ba la ioh ia ka jinglait luid na ka kti ka jingsynshar ka Britain ha u snem 1948, ka la mad ruh ia ki jingiakhih paidbah na ka por- sha ka por, ha kaba ka la mih ka jingdawa ban pynhiar shuki noh ia u Rajapaksa, uba long u President jong ka ri Sri Lanka.
Kumta, katei ka jingkyrduh jong ka Sri Lanka ka la ktah ia ki paidbah nongshong shnong jongka ha baroh ki liang naduh ka bam- ka dih, ki dawai- dashin, ka lyer ban shet jingshet, ka umphniang kali bad kiwei- kiwei de, ha kaba kiba paidbah nong Sri Lanka da ki bnai mynta, ki la hap ban ieng laiñ satar shabar jong ki jaka die umphniang bad jaka die tyndong lyer ba kin ioh ban shet bad leit jingleit.
