Moscow, Risaw:
U Myntri ka tnat ïada jong ka Russia, u Sergei Shoigu ha ka Sngi Balang, u la pynbna ba ka Russia kan ai jinghikai bad pyntbit ia ki shipai ha ka ban pyndonkam ia ki ‘namding ‘Nuclear’ (Ballistic Missile) na ka bynta ka jingpynkhreh ia ki thma ki bym lah ban tip bad kiba lah ban jia hadien-habud.
Kane ka rai ka long hadien ba ka Russia ka la iaid shakhmat khlem da pynsngap ne kohnguh ia ka aiñ ba la khang ia ka jingpyndonkam ia ki tiar pynbthei ‘Nuclear’. Kane ka jingshim rai jong ka Russia ha kum kane ka por ka long ruh ha kane ka por ba ka thma Russia bad Ukraine ka la neh kumba 20 bnai kynthih.
Hapdeng ka jingiakhun thma jong ka Russia bad ka Ukraine, ka Russia ka la byrngem man ka por ba kan pyndonkam beit noh da ki tiar ‘Nuclear’ kiba khlaiñ bor namar ba kam lah shuh ban pynkut ia ka thma bad ka Ukraine namar ka jingai jingkyrshan bad jingiarap jong kiwei pat ki ri ia ka Ukraine, kaba la pynlong ia ka thma Ukraine ba kan neh slem haduh mynta.
Kumta, la ong ba ha kane ka por ka Russia kan ai jinghikai bad kan pyntbit noh ia ki shipai jongka sa ha katei pat ka liang ban iakhun pyrshah ia ki nongshun lada ki nongshun ki pyndonkam da ki tiar ‘Nuclear’ bad ka Russia ruh ka hap ban pyndonkam da ki tiar ‘Nuclear’.
Katkum ki jingtip ba la ioh lum, la ong ba ka Russia ka la dep sdang ai jinghikai ia ki shipai jongka ha katei ka bynta. Hynrei na ka jingkren jong u Shoigu, ym shym lah ban sngewthuh shai la ka Russia ka la dep sdang ne ka dang mut ban sdang noh ia katei ka jingai jinghikai ba kyrpang ia ki shipai jongka ban pyndonkam da ki tiar ‘Nuclear’ ba khlaiñ bor.
