New Delhi, Risaw:
U nongrah ktien jong ka Lebanon sha India, u Robie Narsh haba ai jingkren shaphang ka thma hapdeng ka Israel bad ki lehnoh Hamas jong ka Palestine, u la ong ba ka Lebanon kam kwah ban ïadon bynta ne ban leh eiei haba iadei bad katei ka thma, hynrei ka Lebanon ka kwah ba katei ka thma kan kut noh bad ka Israel ka donkam ban pynkut noh ia katei ka thma da kaba jai-jai khnang ba kane kan ym pur sha kiwei pat ki ri.
Utei u heh u la ong ba ka Lebanon kam kwah ban ïadon bynta eiei ha katei ka thma jong ka Israel, namar ka la shah hiar thma teng ha ka Israel bad ka Lebanon ka la dep mad ia ka jingshyrkhei jong ka Israel. Kumta, u la ong ba kane ka thma hapdeng ka Israel bad ka Hamas ka la wanrah jingsyier ia ka Lebanon ruh bad kumta kam kwah ban ïadon bynta eiei ha kane ka thma.
Hynrei, ha kajuh ka por ruh u la ong ba ka Lebanon ka kyntu ia ka Israel ban iasuk bad pynkut noh ia katei ka thma khnang ban pyllait ia ka pyrthei na ki jingma kiba ap ha kane ka por.
Wat la ki la iohi ba ka kynhun lehnoh Hezbollah ka la ai jingkyrshan ia ki lehnoh Hamas, hynrei u la ong ba ka Lebanon kan kiar na ka ban ïadon bynta lang ha katei ka thma.
Kumjuh ruh haba la kylli pat shaphang ka Iran, utei u nongrah ktien ka Lebanon u la ong ba katkum ka jingioh khubor jong ka Lebanon na ka Iran, la ong ba ka Iran ruh kam kwah hi ban ïadon bynta ha katei ka thma. Hynrei u la ong ba kane kam long ka jingpynkren jong u na ka bynta ka Iran, hynrei ka long tang ka khubor kaba u ïohsngew na ka Iran bad ka shong ha ka Iran ba kan pynpaw bad pynshai hi da lade lada ka long kaba donkam.
Ha ki khyndiat por ba la leit, la ong ba u heh nongialam jong ka kynhun lehnoh Hezbollah napoh Lebanon, u la leit ban kynduh ia ki nongialam jong katei ka kynhun lehnoh Hamas jong ka Palestine bad kumjuh ruh ki nongialam jogn ka Islamic Jihad.
La ong ba ki lad pathai khubor ka Israel ki la pyllait ruh ia ka dur ba la iohi ia ka jingiadon lang jong u heh ka Hezbollah- u Sayyed Hassan Nasrallah, u heh ka Hamas- u Saleh al-Arouri bad u heh ka Islamic Jihad- u Ziad al-Nakhala.
Ha kine ki khyndiat sngi ba la leit, u Myntri ka tnat Bar Ri jong ka Iran, u Hossein Amir- Abdollahian, u la maham pyrshah ia ka Israel ba ka jingther bom ba khlem sangeh jong ka Israel sha Gaza ka lah ban wanrah pat ia kiwei ki jingeh ynda ki ri bad ki kynhun lehnoh bapher bapher ki la iatylli lang ban ai jingkyrshan ia ka Hamas.
