Washington, Risaw:
U nongai jingmut jong ka tnat National Security ka White House, u Jake Sullivan ha ka Sngi U Blei u la ong ba ka United States kam shym ai mynsiem ne pynshlur ia ka Israel ba kan pynshitom bad thombor ia ki paidbah nong Gaza, hynrei ka US ka shu pyndep ia ka kamram kum ka paralok jong ka Israel ban iasnoh kti lang ha ki por ba donkam jingiarap. Wat la katta, u la ong ba ka US kam sngewtynnad bad kam ai mynsiem ruh halor ka jingpyniap dusmon bad ka jingshim pat ia ka jingim jong ki riew paidbah kiba lui-lui bad ki bym don jingiadei eiei bad kitei ki lehnoh Hamas watla ki don lang hapoh Gaza.
Hadien ba la iohi ia ka jingïap ba shyrkhei jong ki paidbah nong Gaza, namar ka jingther bom ba khlem sangeh jong ka Israel sha Gaza naduh ba la sdang ka thma ki lehnoh Hamas bad ka Israel ha ka 7 tarik u Risaw, ka United States pat ka la pynpaw ba kam sngewtynnad halor ka jingshah pyniap dusmon bad ka jingkhlad jong ki mynsiem ba lui-lui, watla ki long ki nong Palestine ne ki nong Israel.
Namar la ong ba ki shipai ka Israel ki la nang pynjur ia ka jingleit tur thma na ryngkew hadien ba ki liengsuiñ thma ki la dep ther bom mynta la katto katne taiew sha kylleng ki bynta jong ka Gaza.
Ki heh ka tnat ka koit ka khiah jong ka Gaza Strip, ki iathuh ba napdeng ki 2.3 Million kiba don hangtei, 8,005 ngut ki nong Palestine, kynthup ia 3,324 ngut ki khyllung- khynnah, ki la duh ei ia ka jingim ha ka jingther bom jong ki shipai ka Israel sha Gaza.
