Indiana, Risaw:
Ki bor pyniaid ka Indiana ha ka Sngi U Blei, ki la pyntip ba ka la mih ka jingïasiat hapoh kawei ka jaka leh kmen ha Indianapolis ha kaba kawei ka briew ka la khlad noh syndon bad 8 ngut pat ki la mynsaw na katei ka jingjia ha katei ka step.
Kane ka long ka sien ba ar ia ka United States ban kan ioh mad ia kum kitei ki jingjia synreit kuli tang hapoh jong kajuh ka taiew hadien ka jingjia ha Maine kaba la shim ia ka jingim jong 16 ngut ki briew.
Ka heh jong ka Indianapolis Metropolitan Police Department, ka Samone Burris ka la iathuh ba ki heh pulit ki la ialeh katba lah ban leit pynpoi kloi sha katei ka jaka ha ka por kaba biang hynrei la ong ba kim shym lah shuh ban iarap ne pyllait im ia utei uwei uba la khlad naduh ka por kylla step jong ka Sngi Saitjaiñ bad Sngi U Blei ha ka por ba la ïohsngew ia ka jingriew ki ktang suloi.
Shuh shuh ruh katei ka heh pulit ka la pyntip ba ha katei ka jingjia, katei kaba khlad ka dei kaba la samla heh bad kaba la khlad hashen ha ka jingksam ki kuli bad ia kitei kiba mynsaw baroh pat la pynkit sha ki jaka sumar kiba don ha katei hi ka nongbah.
Ia katei ka samla ba khlad ym pat shym la pynithuh eiei wat haduh jong ka step Sngi Nyngkong, hynrei la shu ithuh ba katei ka samla kan dei kaba dang hapoh ka 22 snem ka rta.
Kumta ka Burris ka la iathuh ba ki pulit ki dang ialeh ban bud dien bad ban wad bniah shwa ia ka daw ka jingsdang jong katei ka jingiakynad bad ban lap ruh ia ka jingdon jingiadei jong katei ka samla bad kitei kiba ngat ha katei ka jingjia, kynthup ia u nongsiat.
Namar la ong ruh ba ym pat shai ia ka daw jong katei ka jingjia bad ym tip ruh katno ngut na kitei kiba mynsaw, ki la ïadon kti lang bad ki la iasiat markylliang ha katei ka jingjia.
Ki pulit ki la ioh bat noh ruh ia katto katne ngut ki suba don kti ha katei ka jingjia bad ki dang wad ruh ia ka jingdon jong kito kiba ïadon kti lang ha katei ka jingjia ha katei ka step.
Kumjuh ruh ha ka 26 tarik jong une hi u Risaw, kawei ka jingsynreit kuli naphang hapoh Maine ka la wanrah ia ka jingïap jong 18 ngut bad 13 ngut pat kiba la ngat bad mynsaw ha katei ka jingjia.
Haba iadei bad kane ka jingjia, ki pulit ki la pharep ia uwei u suba don kti uba la ithuh kyrteng kum u Robert Card, ha kaba la lap noh ruh ia ka metiap jong u tang hadien 48 kynta jong katei ka jingjia ha ka miet Sngi Thohdieng.
Katkum ka jingpeit thuh jong ki pulit, la suba ba ka jingïap jong u Robert ruh kan dei beit ka jingsiat iap hi da lade ia lade hadien ba u la sngewthuh ba ki pulit ki la thwet bad bud dien ia u namar katei ka jingjia kaba u la dep don kti ha ka sngi ba la leit.
Kumta la ong ba katei ka jingjia synreit kuli naphang hapoh Maine jong ka nongbah Lweiston ha kane ka por, ka long ka jingjia synreit kuli kaba shyrkhei tam ba ka US ka la ioh mad ha une u snem. Bad ka long ruh ka jingjia kaba shyrkhei tam hadien jong ka jingjia synreit kuli naphang hapoh ka skul Uvalde.
Katkum ka kaiphod na ka Gun Violence Archive, la ioh jingkheiñ ruh ba ki don haduh 566 tylli ki jingjia synreit kuli hapoh United States ha une u snem.
