London, Risaw:
U Myntri Rangbahduh jong ka Britain, u Rishi Sunak bad u President jong ka France u Emmanuel Macron ha ka Sngi U Blei, ki la pynpaw ia ka jingsngewkhia halor ka jingneh slem jong ka thma hapdeng ka Israel bad ka Hamas, bad kumta ruh ki la kyntu ia ka jingkongsan ban phah ia ki jingiarap bad ki marbam sha ki paidbah nongshong shnong jong ka Gaza kiba la shah ktah jur na katei ka thma.
La ong ba kitei ki nongialam ki shu ioh ban iakren lyngba jong ka phone bad ia pynbeit halor ki jingdonkam ban phah jingiarap sha ki paidbah nongshong shnong ka Gaza namar ka jinghiar thma ba khlem sangeh jong ka Israel hadien ba ki lehnoh na Gaza ki la leit thombor ia ka Israel ha ka 7 tarik jong une u Risaw.
Ha katei ka 7 tarik u Risaw, ki lehnoh Hamas ki la leit thombor kynsan ia ka Israel ha ka por ba khlem poi pyrkhat bad kaba la shim ruh ia ka jingim jong palat 1,400 ngut ki paidbah jong ka ri Israel. Dei kane ruh ka daw kaba la pynkhie bitar ia ka Israel, ha kaba, ka Israel ka la pynbna ba smai ruh ba kan pynduh- pyndam noh syndon ia katei ka kynhun lehnoh ha kane ka sien mynta.
Ka tnat ka koit ka khiah jong ka Hamas, kaba synshar hapoh Gaza Strip, ka la pyntip ba ka jingïap ki paidbah ka Palestine hapoh Gaza na ka jingther bom ka Israel haduh kine ki sngi, ka la kot ia ka 8,000 tam bad mar shiteng na kitei kiba khlad ki dei ki khyllung ki khynnah.
Kumta, kine ki nongialam jong kitei ki 2 ri ha kane ka por pat, ki pynpaw ia ka jing kongsan ban phah ia ki song jingiarap bad ki mar bam sha ki paidbah nongshong ka Gaza, kiba la shah ktah jur ha katei ka thma.
