Imphal, Risaw:
U Myntri Rangbah jong ka Manipur u N Biren Singh u la ong ba ka sorkar kmie ka la mynjur ïa ka jingthmu pyntreikam ïa ka pisa kaba T. 480 klur na ka bynta ban shna bad pynbha ïa ki surok ha ki bynta ba shaphang Shathie jong ka jylla.
Ha ka Sngi U Blei, u Myntri Rangbah u la plie ïa u maw nongrim na ka bynta ban sdang ïa ki jingpyntreikam bapher bapher ki ban wanrah ïa ki kam pynroi kaba la long ha Keirak kaba don ha Kakching distrik.
U Singh, uba la bat ruh ïa ka tnat Planning, u la ong ba ïa ki jingmaramot ïa ki surok kiba la jot yn sa pyntreikam naduh na Mayang Imphal shaduh Kakching Lamkhai, ha ka jingjngai kaba 20 km ka ban pyntreikam ha kaba kut jong mynta u snem.
U la pyntip ba ka sorkar kmie ka la mynjur ban pyntreikam ïa ka pisa kaba T. 480 klur na ka bynta kane.
Ki surok ki ban shah pynbha ki kynthup ïa ki Four Lane lait noh ki surok kiba don ha ka jingjrong kaba 10 km kiba dei ki Two Lanes.
Ki Project ba la thmu ban pyntreikam ki kynthup ka jingpynbha ïa ka surok na Keirak shaduh Wabagai Tera Urak bad ka jingpynbha ïa ka surok na Wabagai Tera Urak sha Turel Mamei.
Ka kynhun ka ban shimti na ka bynta ka jingpynbha ïa kawei na ki ar tylli ki surok ka dei ka DRDA.
