Aizawl, Risaw:
U Myntri Rangbahduh u Narendra Modi u la pep noh ban leit pynlong ïa ka jingïalang paidbah ha Mamit ka jaka ka ban pynlong ïa ka ilekshon ha Mizoram kaba dei ban long hynnin ka sngi, ka 30 tarik, Risaw, la ïathuh u heh nongïalam jong ka seng BJP.
U Myntri ka sorkar kmie uba dei khmih ïa ka tnat ki kam pohïing u Amit Shah un sa shim ïa ka jaka jong u Modi, hynrei ha kaba ïadei bad kane, haduh ba la thoh ïa ka khubor ym pat lah ban pynshisha ïa ka tarik ban pynlong ïa ka jingïalang paidbah, la ïathuh u nong-ai jingmut sha ki lad phah khubor jong ka seng BJP ha ka jylla u Johny Lalthanpuia ha ka jingïakren bad ki nongthoh khubor.
U Lalthanpuia, ha kaba ïadei bad kane, um shym la pynpaw ïa ka daw ha kaba ïdei bad ka jingpep noh jong u Modi ban leit jngoh ïa ka jylla.
Sa uwei pat u heh nongïalam jong ka seng BJP bad u Myntri jong ka sorkar kmie u Nitin Gadkari u la don bynta ha ka jingïalap ilekshon hynnin ka sngi ha ka jylla na ka bynta ka ilekshon Assembly ka ban sa long ha ka 7 tarik, Naiwieng, la ong shuh shuh u Lalthanpuia.
U Shah un sa leit ban jngoh ïa ka Mamit bad ïa ka bynta ba shaphang Shathie jong ka jylla Mizoram, u la ong.
Ka seng BJP ka la phai khmat ha kaba ïadei bad ka vote jong ki kynhun rit paidbah kiba kynthup ïa ki Chakma, Bru, Mara bad Lai kiba shong basah ha ka bynta ba shaphang Shathie jong ka jylla.
Ka seng BJP, kaba la ïakhun ha ki 39 tylli ki konstitwensi ha ka jingïakhun ïa ka ilekshon Assembly kaba la lah ha u snem 2018, ka la pynïakhun ïa ki 23 ngut ki kyrtong ha kane ka por.
U President jong ka seng BJP u JP Nadda naduh ka sngi Thohdieng u la dep ban pyllait ïa ki mat treikam ha kaba ïadei bad ka ilekshon, ha kaba u la buh ka jingkular da 33 per cent ka bhah na ka bynta ki kynthei ha ki kam sorkar bad ban weng noh ïa ka jingeh kaba mih na ki bynta khappud kaba ju wanrah borabor ïa ki jingïapher jingmut bad ka Assam, napdeng kiwei pat.
