Nongstoiñ, Risaw 31
Ka New Nongstoiñ Sports Social & Cultural Club kawei na ki klob ba paw bha ha West Khasi Hills bad kaba ju pynlong ïa ki lympung ïalehkai bapher bapher, ka la pynpaw ïa ka jingthrang bad jingangnud ba ka Sorkar Jylla lyngba ka tnat ïalehkai kan phaikhmat lem ban leh eiei na ka bynta ka madan ïalehkai khamtam ha kaba ïadei ba ki jaka shong ki paidbah (gallery) ha sawdong jong ka madan.
Ïa kane la pynpaw ruh da u Bah G. Syiemlieh President ka NNSSCC haba kren bad u nongthoh khubor ha ka Sngi Ba-ar namar mynta kane ka klob ka la pynkhreh shaid shaid ban pynbit pynbiang ïa ka madan ïalehkai jong ka ha New Nongstoiñ na ka bynta ka lympung ïalehkai phutbol ïa kaba la tip kum ka Invitation Knockout Football Tournament 2023-24 ha madan New Nongstoiñ.
Haba kylli kumno ka klob ka pynlut ban shna ïa ki jaka shong ïa ki paidbah da ki lyntang ha u snem ba la dep, u Bah Syiemlieh u la ong ha kaba ïadei bad ka lympung ïalehkai ha u snem ba la dep, la ïa sei borbah na ka liang ka klob bad ki nongkyrshan. “Ka jinglut naduh ba shna ïa ki jaka shong bad kiwei kiwei baroh kam duna shuh ïa ka T. 46 lak, hynrei nga kyrmen ba ki paidbah kin dangai ka jingkyrshan khnang ba ha na ki snem ba wan yn nang lah ban pynlong ïa ki lympung ïalehkai kiba kham heh shuh shuh.”
U Bah Syiemlieh u la ong ruh ba na ka liang ka klob ha kawei ka liang ka don ha ka jingduh jingkyrmen kyndiat namar kam shym la ïoh jingïarap eiei na ki bor Sorkar lyngba ka tnat ïalehkai, hynrei ka NNSSCC ka kyrmen ba ka Sorkar kan phaikhmat lem na ka bynta ki jingdonkam ha kane ka madan.
U la ong ruh ba ha ka jingshisha ka NNSSCC ka dei kawei na ki klob kaba shait pynlong ïa ki lympung ïalehkai bapher bapher naduh ki khynnah bad ka kyrmen ba lyngba ka jingkyrshan ka Sorkar namar ka jingangnud ka long ban ïoh noh tang ki jaka shong kiba paka (gallery).
U la ïathuh ruh ba na ka bynta ka lympung ka ban sa plie pyrda ha ka 10 tarik u Naiwieng mynta u snem, ka jingpynkhreh ka dang ïaid shakhmat bad na ka liang ka klob bad ki nongkyrshan ka la pynlut pynsep hi khlem da don mano mano ba ïarap.
Ka NNSSCC sa shisien pat ka kyrmen ba ki paidbah kin ai ka jingkyrshan ba kin wan ban sakhi biang ïa kane ka lympung bad ka da buh ruh ba tang ki paidbah lehse kan lah ban ïarap ban pynmih ïa ki jinglut jingsep ïa kaba ka klob ka la pynlut lyngba kane ka lympung ïalehkai.
U la ïathuh ba ha katei ka sngi plie pyrda, ka Ribhoi United FC kan ïakhun pyrshah ïa ka Jamshedpur FC ha ka por 1:30 mynsngi ha madan New Nongstoiñ bad ka khusnam ha kane ka lympung long baroh T. 12 lak tyngka bad ka bai rung kan long T.150 tyngka marwei.
