Khliehriat, Risaw 31
Ka Golden Lion Veteran Football Team bad ka Border Area Veteran Football Team ki la khur ïa ka jingjop ha ka lympung ïalehkai ‘1st Open to All Veteran Football Tournament’ ba la pynïaid da ka East Jaiñtia Hills District Football Association ha ka sngi Ba-ar ha madan Artificial Turf kaba don ha Diengshynrum, Khliehriat.
Ha ka jingïakhun kaba nyngkong, ka Golden Lion Veteran ka la pynliem noh ïa ka R. Synrang Shahkhain Veteran Football Team da 2-1 kol. Ïa kine kol la thep da u Hopinglast Rymbai ha ka minit kaba 19 bad u Comfort Dkhar ha ka minit kaba 23. Katba ka shi kol jong ka R. Synrang Shahkhain la thep da u Ïasyllok Bareh (61).
Ha ka jingïakhun kaba bud, ka Border Area Veteran Football Team ka la pynliem da 6-1 kol ïa ka Khliehriat East Veteran Football Team bad u Dimon Ksih u la khur ïa ka hat-trick.
Ïa kine la thep da u Boyme Rymbai ha ka minit kaba 12, u Firmly Rymbai (22), u Dimon Ksih (34, 42& 61) bad u Arwot Dkhar (58). Katba ïa ka shi kol jong ka Khliehriat East la thep da u Joshua Sajem (56).
