U Nongsaiñ Hima, 1990
Ka lyer Langtharai ne ka Er Kyllang ka la sar sha kylleng ka ri Khasi naduh ba kut u bnai March bad ki dang mih ki khubor ïaka jingpynshitom ka mariang ïa u khun u hajar ka Ri Khasi. Ki riew tymmen ki ong ba kine ki jingjia ha kine ki sngi kim pat ju jia koit. La wan u slap, la wan u phria bad ka lyer langthari hynrei kam pat ju bam briew kumba long mynta u snem bad tang ha ka shibnai. Ka por jong u Er Kyllang kan dang neh haduh ba kut jong u bnai June ki la iathuh, hynrei ki kyrmen ba ka bor u Trai nongthaw kan ri bad julor shuh ha ki sngi ki ban d ang wan bad ban ym duh shuh ki mynsiem briew. Katkum ka jingkhein ba la ioh baroh kiba la ïap ha ka jingbeh ka ‘Er Kyllang ki long 12ngut ha kylleng ka Ri.
Kaba kum kane ka jingjia ka pynkyndit ïa baroh bad kumno ka ktah ïa kiba haïing jong kito kiba la khlad noh ym lah shuh ban batai namar ka shu long kyndit khlem da pyni dak ïa kiba u briew u lah ban shim ïaki lad jing-ïada. Ka Ri baroh kawei ka poi ha ka lyngngoh ba haduh katne ki jingjulor lah ban wanrah tang ha ka shikyllipmat. Ki don kiba suba ba don ka daw ba la jia haduh katne ha ka ri u Hynñiewtrep. Hynrei ka don ka jingïapher bad ka jingjia kaba la jia ha u snem 1988 ha ka ba la ther jur u slap uba la pynjot bun ïa ki jingthung jingtep bad haba la pra bun ïa ki jingthung jingtep bad haba la pra ki lynti syngkien.Mynta u snem ka bam ka mariang sa ïa ka mynsiem briew. Ki shnong kiba heh kumjuh ki barit ki la shah syllad naphang haba dei ïaid lynti u Kyllang. U khlem tip shuh ïaki khyllung ne ki rangbah hynrei u la bam duh wat ïa kiba dang hok ruh. Dei na kane ka daw ba baroh ki shaïong bad kim lah shuh ban batai balei ka poi kat sha kane ka apot sepsngi.
Hynrei iaki ba dang don ha sla pyrthei ym lah ban ong da kumwei, ki dei ban ïai beh sha la ki kam ki duk bad ki ban dang dei ban pyndep ïa ki bun bah ki kam ba dang sah. Hynrei ym don uwei ruh u ban rai da kumwei nalor ba shu kohnguh beit ba kane hi te ka long ka jingsneng kaba khraw ia ka jaitbynriew jong ngi. Ki stad saïan ki ong ba lada la kham tip bha ïaka jinglong jingman ka mariang bad ka jingïadei jong ka bad u khun bynriew shibun kiei kiei lah ban leh. Ki ong shuh ba lada lah ban sumar ïaka kan wanrah jingkyrkhu ïa u khun bynriew pateng la pateng. Ki ong ba ki ri shyiap kiba bun jong ka pyrthei baïar kim shym la mih hi. Bunsien ka long ka jing-leh bym suitniew jong u khun bynriew ba la jia kaei kaei kaba sniew. Ki iathuh ba ki khlaw ki btap, ki jing-thung jingtep bad ka jingmih u briew ba man la ka sngi ka don ka jingïadei ba jan eh.
Hynrei haduh katno la lah ban pynbiang ïa kaba donkam bad ka mariang ha ka trei ka ktah, ka khaïi ka pateng bad ha ka rukom im ka ban pynïasuk ïa u briew bad ka mariang ka long ka jingkylli kaba jylliew ka jingmut.
Lymda lah ban ïa phai dien ban shim ia ki jingsneng ba la don lypa ka jingtip u briew ha ka juk mynta ka long lehnohei. Ka por kan sa batai.
