Jowai, Risaw 31
Ka shlem treikam u Deputy Commissioner, West Jaiñtia Hills District ha ryngkat ka jingïatreilang bad ka shlem treikam u District Sports Officer, ha ka sngi Ba-ar ki la pynlong ïa ka Fit India Freedom Run 4.0 bad National Unity Day Run.
Ha kane ka jingïakop mareh surok kaba la wan shim bynta haduh 155 ngut ki samla kaba kynthup ïa ki kynthei bad shynrang, la kaweh lama da u Assistant Director ka tnat ïalehkai u Bah Khroobok Passah (DSO) ha ka jingdonlang ki dkhot ka West Jaiñtia District Sports Association.
Ïa kane ka jingïakop la pynlong halor ka thong jong ka Rashtriya Ekta Diwas ne ka sngi pynbna sha ki nongshong shnong shaphang ka nongrim jong ka jingïatylli bad ruh ban leh burom ïa ka lyngkhuh sngi kha u Sardar Vallabhai Patel uwei na ki riew khraw pyrkhat bad u nongsaiñ dur ïa ka ri India hadien ka jingsynshar ka sorkar phareng.
Ïa kane ka jingïakop la sdang na madan Kiang Nangbah Stadium bad ïaid lyngba ka Ladthad-laboh, Memory Colony, Salaroh, Dulong, Panaliar, Loomiongkjam, Ïongpiah, Mission Compound, Chut -wakhu, Ïawmusiang, Loom -sooïung Newhill, Lad-thadlaboh bad pynkut ha Indoor Stadium.
Ha kane ka jingïakop ha ka liang ki shynrang la jop da u Teiboklang Biam uba la lah ban pyndep ha ki 32 minit 21 sekhon, u Dasaman Kyndait uba la wab ba-ar u la pyndep ha ki 32 minit 45 sekhon bad u Daemiryntih Pakma u la pyndep ha ki 32 minit 50 sekhon.
Katba na ka liang ki kynthei la jop da ka Happiness Phawa kaba la lah ban pyndep ha ki 46 minit 26 sekhon, nangta ka Monlangki Kyndait kaba la wan ba-ar ka la lah ban pyndep ha ki 50 minit 27 sekhon bad ka Mini Kyndait kaba la pyndep ha ki 54 minit 36 sekhon.
Ïa ki khusnam kaba long da ka Memento ryngkat ka song pisa T.4,000 T.3,000 bad T.2,000, la sam sha baroh ki nongjop da u Bah L. Nartiang, Branch Manager Meghalaya Cooperative Bank Ltd bad u Patrick Lamare, Vice-President ka West Jaiñtia District Sports Association.
