Jowai, Risaw 31
U Chare Mulieh u la khyrwit da ka hat-trick ban pynlong ïa ka Sabahmuswang ban khur ïa ka jingjop ha ka First Division Football Tournament (Chatister Kharkongor Memorial Trophy 2023) ba la pynïaid da ka West Jaiñtia District Sports Association (WJDSA).
Kane ka la wan hadien ba ka Sabahmuswang ka la lah ban pynliem haduh 6-1 kol ïa ka Moosyiem Shangpung ha ka Sngi Ba-ar ha Kiang Nangbah Stadium kaba ha Ladthadlaboh, Jowai.
Ha ka jingïakhun, ka kylla step ka la kut khlem da lah ban pynkhih ïa ka jar mano mano bad ha ka kylla miet ka Sabahmuswang ka la ïoh ban ñion ïa ka Shangpung Moosyiem bad thep haduh 6 kol. Katba ka Shangpung Moosyiem ka la ïoh lad ban pynphai shi kol.
Ïa kine ki 6 tylli ki kol jong ka Sabahmuswang la thep da u Needful Shylla ha ka minit kaba 74, u Wanmiki Lyngdoh (79 & 81) bad u Chare Mulieh (85, 89 & 90+2) na ka bynta ban khur ïa ka hat-trick. Katba ka shi kol jong ka Moosyiem Shangpung la thep da u Shickel Langbang ha ka minit kaba 77.
Haba phai sha ka Super Division Football Tournament (Kiang Nangbah Memorial Trophy 2023), ka Sailung Ïalong ka la pynliem ïa ka Nangbah Mulang da 4-1 kol.
Ïa ki kol jong ka Sailung Ïalong la thep da u Arwan Rymbai ha ka minit kaba 16, u Bachan Pale u la thep ar kol ha ka minit kaba 50 & 69 bad u Casper Lhuid (90+4). Katba ïa ka shi kol jong ka Nangbah Mulang la thep da u Albert Lyngdoh (77).
Ha ka 1 tarik Naiwieng, ka jingïakhun jong ka First Division kan long hapdeng ka Mookyndur pyrshah ïa ka Demthring ha ka por 12 baje mynsngi. Katba ha ka Super Division kan long hapdeng ka Mynthong pyrshah ïa ka Ladthadlaboh ha ka por 2 baje janmiet.
