Shillong, Risaw 31
Ka shi kol ba la thep da u Alan Marweiñ ka la biang pura ia ka Kharang SC ka la jam sha ka final ha ka lympung ïalehkai SSA U-20 4th Division Football League 2023.
Kane ka la wan urlong hadien ba ka la lah ban pynliem noh ia ka Lamlynti FC da 1-0 kol ha ka sngi Ba-ar ha SSA Stadium, Polo.
Ha kane ka jingiakhun semi final kaba nyngkong kitei ki kynhun ki la pyrshang ban iakhun tyngeh naduh kaba sdang, hynrei kim shym la lah ban thep kol haduh kaba kut jong ka kylla step.
Hadien ba la bteng ia ka jingiakhun jong ka kylla miet baroh ar ki kynhun ki la pyrshang ban iakhun tyngeh, hynrei ka Kharang ka la ioh ban pynkhih jar lyngba u Alan ha ka minit kaba 77. Kane ka shi kol ka la nangpynioh mynsiem ia kane ka kynhun ban iai bteng ha ka ban iakhun tyngeh bad kumjuh ka Lamlynti kaba dangdonkam ban pynphai, hynrei haduh kaba kut kim shym la lah ban pynurlong bad ka la mad ia ka jingshah rem.
Lyngba kane ka jingjop ka Kha-rang ka dangap ban iaknieh nam lahduh pyrshah ia kawei ka kynhun ka ban khur jingjop ha ka semi final kaba ar ka ban long ha ka sngi Balang hapdeng ka Iatyllilang SC bad ka Mawkriah West SC ha ka por 2 baje janmiet.
