Shillong, Risaw 31
Ka kynhun ki rangïalehkai phutbol ka Jylla ka la mad ïa ka jingshah rem kaba nyng-kong eh ha ka Manipur da 2-1 kol ha ka 37th National Games kaba la long ha ka sngi Ba-ar ha Fatorda, Goa.
Ha kane ka jingïakhun kaba nyngkong jong ka Group-B, ka Meghalaya ka la ïoh ïa ki kabu kiba biang, hynrei kam shym la lah ban pynurlong ïa ki kabu ksiar. Kane ka kynhun ka la lah ban thep shi kol hadien ba ka la shah thep shwa ar kol ha ka Manipur.
Wat la kine ki kynhun kim shym la lah ban thep kol ha ka kylla step, hynrei ka Manipur ka la ïoh ban pynkhih jar nyngkong ha ka kylla step lyngba ka free-kick ba la shut da u Thiyam Chingkeinganba.
Hadien katto katne por ka Meghalaya ka la hap ban ïalehkai sa tang shiphew ngut na ka daw ba u Fullmoon Mukhim u la shah sei da ka red card hadien ba ïoh pdiang ar tylli ki yellow card.
Dei hangne ba ka Manipur ka la thom naphang bad dei ha ka minit kaba 83 ba ka la ïoh ban thep ïa ka kol kaba ar lyngba u Phijam Meetei ha kaba ki rangïalehkai ‘dien ka Jylla lem bad u rangapkol kim shym la lah ban khanglad na ka jingshah thep.
Hashwa ban wai ka Meghalaya ka la lah ban pynphai kylla shi kol lyngba u Donlad Diengdoh ha kaba u rangapkol ka Manipur um shym la lah ban pyllait na ka jingsah thep.
Watla kane ka kynhun ki shiphew ngut ki rangïalehkai ka Jylla ki la ïai pyrshang ban pynphai, hynrei haduh kaba kut ka jingïalehkai kam shym la lah ban pynurlong bad ka la mad ïa ka jingshah rem.
Kane ka kynhun hapoh ka jingïalam u Bah Khlaiñ Pyrkhat Syiemlieh ka donkam ban ïalehkai ha ki ar tylli ki jingïakhun kiba dangsah jong kane ka group khnang ba ka lah ban jam sha ka semi final.
Te kumta ka Meghalaya kan ïakhun pyrshah ïa ka Maharashtra ha ka sngi Palei (2 tarik) bad ïa ka Kerala ha ka 4 tarik.
