Moscow, Risaw:
U President ka Russia, u Vladimir Putin ha ka Sngi Nyngkong u la kynnoh ia ka Ukraine ba dei ma ka bad ki ri jong ka thaiñ West kiba la wanrah ia ka jingkulmar bad ka jingjia hapoh ka Kad Liengsuiñ Makhachkala ha Dagestan ha ka janmiet Sngi U Blei. Na ka liang ka United States, ka la pynrem kylla ia ka Russia haba iadei bad katei ka jing kynnoh bad ka US ka la ong ruh ba katei ka jing kynnoh jong ka Russia ka long ka bym shong nongrim haei-haei ruh.
Ki bor pyniaid ka Russia ki la ioh bat noh ia kumba 80 ngut ki briew kiba don kti ha katei ka jing pynkulmar ha katei ka thaiñ ba bun ki paid Muslim bad la ong ba kitei ki paidbah ki la leit ban ker kut ia kawei ka liengsuiñ kaba la wan poi na Israel ha katei ka jan miet.
Haba iakren bad ki heh jong ka tnat Security Council, u Putin u la ong ba ka daw jong kine ki jingjia ka long namar ki don ki ri kiba kwah ban pynthud ia ka shongsuk- shong saiñ hapoh Russia bad ruh u la kynnoh ba dei ka United States ka la wanrah ia ki jingma bad kaba thmu ban pynthud ia ka suk- ka shngaiñ ha Middle East.
