Shillong, Risaw 31
Ka Sohryngkham SC bad ka Jongksha SC ki la ïoh jingjop kaba nyngkong ha ka Second Division Football League 2023 ba la pynïaid da ka Shillong Sports Association (SSA).
Ha ka jingïakhun kaba nyngkong jong ka Group-A kaba la long ha ka Lah Sngi U Blei ha SSA Stadium Polo, ka Sohryngkham ka la pynliem noh ïa ka Mawtawar SC da 3-2 kol. Kane ka la wan urlong lyngba u Wanlambha Kharpran uba la ïoh ban thep ar kol.
Haba phai sha kane ka jingïalehkai, ka Mawtawar ka la ïoh ban pynkhih jar nyngkong eh lyngba u Fredrick Lyngdoh ha ka minit kaba nyngkong. Hadien shiteng kynta ka Sohryngkham ka la lah ban pynphai kylla shi kol lyngba u Wanlambha ha ka minit kaba 37 na ka bynta ban ïakhaid mar shi kol ha ka kylla step.
Hadien ba la bteng ïa ka jingïakhun jong ka kylla miet ka Sohryngkham ka la thep biang ïa ka kol kaba ar lyngba u Iarbok Kshiar (47). U Wanlambha u la pynbud biang ïa ka kol kaba ar ka jong u ha ka minit kaba 53 na ka bynta ban tam da 3-1 kol.
Hadien katto katne por ka Mawtawar ka la pynphai kylla shi kol lyngba u Ricky Chyne ha ka minit kaba 75 hashwa ba kan mad ïa ka jingshah rem ha kane ka jingïakhun.
Haba phai sha kawei pat ka jingïakhun kaba ar, ka Jongksha ka la pynliem noh ïa ka Laitlyngkot SC da 3-0 kol. Ïa kine la thep da u Mangïarkam Kshiar ha ka minit kaba 36, kumjuh u Franky Nongspung (69) bad u Jopborlang Khongsngi (76).
Kane ka lympung kan bteng biang ha ka 2 tarik u Naiwieng ha kaba ka Nongrah kan ïakhun pyrshah ïa ka Pohkseh SC ha ka por 11:30 mynstep, katba ka Lumshyiap SC ïa ka Imson FC ha ka por 1:30 mynsngi.
