Texas, Risaw:
Katkum ki khubor la ong ba kawei ka doktor kaba la tip kum ka Dr. Talat Jehan Khan, 52 snem ka rta, ka la shah pyniap habar ka iing sah jong ka ha Conroe, hapoh ka nongbah Texas jong ka United States. Katei ka doktor ka la shah pyniap ha uwei u briew u bym don jingithuh uba la don ha ka rta kumba 24 snem bad uba la leit poi sha katei ka jaka ha ka por bym poi pyrkhat.
Pynban kaba pynlyngngoh ha kane ka jingjia ka long ba katei ka doktor ka la shah pyniap ha ka por mynsngi-mynshai ha ka por kumba 12:30 mynsngi, katba katei ka briew ka dang shong ha ka miej bam kaba don habar jong ka iing ha ryngkat bad u ksew jong ka ha katei ka por ba utei u briew u la leit poi kynsan bad pyniap ia ka hakhmat jong ki khun bad ki para marjan jongka khlem jingsalia ne jingsheptieng ïano- ïano ruh.
Uwei na ki para marjan jong katei ka briew, u Mathew Amador, u la iathuh ba mar ia ïohsngew ia ka jing lynñiar ki khun jong katei ka doktor, u la leit ban mareh ha ryngkat ka wait bad ka phone ha ka kti jong u, ha kaba u la iohi ia utei u briew uba twad ia ki thied snam ‘pulse’ jongka bad hadien kata u la dung ia ka da ka tari haduh 3 sien dung.
La ong ba ha mar kata ka por, u Amador u la hylla ia utei u briew bad utei u briew u la phai shadien bad phet krad noh na katei ka jaka.
Ki pulit ki la jer kyrteng ia u Miles Fridrich, kum u suba don kti ha katei ka jingjia bad ki la ioh kem noh ruh ia u tang hadien katto katne kynta jong katei ka jingjia bad ka jingtohkit ka dang iaid shakhmat.
