New Delhi, Risaw:
Katkum ki khubor, la ong ba ka Israel ha kane ka kynti, ka la kyntait ban iakren ïasuk ne ban sangeh noh ia ka thma pyrshah ia ki lehnoh Hamas jong ka Palestine hadien ba ka Israel ka la phah ia ki shipai ryngkew ban leit hiar thma noh na ryngkew bad ban pynduna noh ia ka jingther bom na suiñ.
Ka daw jong ka jing bym treh ka Israel ban sangeh ia ka thma ka long namar ka jingbitar halor ka jingleit thombor ba kyndit jong kitei ki lehnoh Hamas ia ka Israel ha ka 7 tarik jong une u Risaw, ha kaba da ki hajar ngut ki paidbah ba lui-lui jong ka Israel ki la khlad bad ki la ngat ha katei ka kam thombor jong kitei ki lehnoh. Dei ha katei ka por ruh ba ka Israel ka la pynbna syndon da ka thma pyrshah ia kitei ki lehnoh jong ka ri Palestine, watla ka Israel ka dang shu dep ban iasoi bad ka Palestine ban ym pynmih jingïakynad shuh bad ban iatrei lang noh ha kine ki sngi ki ban wan.
Namar la ong ruh ba katei ka jingleit thombor jong kitei ki lehnoh Hamas ia ka Israel, ka lah ban long namar ka jingiasoi jong ka Israel bad ka Palestine ia ka jingiasuk bad ka jingiatrei lang. Dei tang hadien katto katne sngi ruh ba ka Israel ka dang dep ban soi ia katei ka jingiakut bad ka Palestine ban ïasuk bad ban iatrei lang noh, ba ki lehnoh Hamas khlem da pynslem shuh ki la leit ban hiar thma ia ka Israel khlem pyrkhat shuh wat ban shim ia ka jingim jong ki khyllung- khynnah, ki kynthei bad jong baroh hi ki ‘riew paidbah kiba lui-lui kiba long tang ki nongshong shnong jong ka Israel.
Watla katta, la ong ba ka Israel ka la dep ioh lypa ia ka jingmaham na kiwei pat ki ri, ba ki lehnoh Hamas jong ka Palestine ki dang pynkhreh bad ki la pyn-ap da ki snem ban ioh ban leit thombor bad ban hiar thma ia ka Israel. Hynrei la ong ba ka Israel kam shym pynsngap ne shah shkor ia kitei ki jingmaham bad ka la leh bym suitñiew eiei. Hynrei dei haduh ynda ba ki lehnoh Hamas ki la leit ban thombor bad hiar thma ia ka Israel ha ka 7 tarik jong une u Risaw, ka Israel ka la kyndit bad khie bitar namar ka jingbym lah ban ai ia ka jing-iada kaba pura na ka bynta ki paidbah nongshong shnong jong ka ha ka por kaba biang.
