Ka National People’s Party (NPP) ha Meghalaya ka la ïoh da u nongïalam bathymmai hadien ba la ïamonlang ban pynlong ïa u Bah Prestone Tynsong kum u President ka seng kaba ïalam ïa ka jingsynshar ha ka jylla. U Bah Prestone u la shimti na u MP ka Rajya Sabha, u Dr Wanwei Roy Kharlukhi, uba la bat ïa kane ka kam naduh ba ka NPP ka la wan ha kane ka jylla da ka jingbtin lynti jong u Purno Agitok Sangma. Ym lah ban len ba u Dr Kharlukhi u dei uwei na ki paralok ba ïajan tam jong u Purno bad uba la don beit ha syndah jong u bad kumjuh ruh bad u Conrad K Sangma wat hapdeng ka jingbym lah jong ka NPP ban leh bha ha ka ilekshon MLA ha u snem 2013. Ka jingaiti noh jong u Dr Kharlukhi ïa ka shuki President sha u Bah Prestone ka wan ryngkat bad ki jingeh ïa une u Symbud Myntri Rangbah bad u MLA ka Pynursla konstitwensi uba la jop la san sien lynter.
U Bah Prestone u la shimti ïa kane ka kam ha ka por ba ka jingpynkhreh na ka bynta ka ilekshon ban jied ïa ki nongmihkhmat sha ka Ïingdorbar Khasi Hills Autonomous District Council bad Jaiñtia Hills Autonomous District Council ka dang ïaid. Nalorkata, ka wan ruh kumba san bnai shwa ka ilekshon sha ka Ïingdorbar Thawaiñ jong ka Ri – Lok Sabha. Ngi ïohi ba kumba ka long mynta, dei tang ka Voice of the People Party (VPP) kaba la ïaid shakhmat ban pynïar ïa ki tnat bad ban bsuh ha man kawei-pa-kawei ka konstitwensi kum ka jingpynkhreh na ka bynta ka ilekshon KHADC & JHADC bad MP Lok Sabha katba kiwei pat ki seng saiñpyrthei ki dang ïohthiah lyngngai imat ba kim pat jah thait na ka ilekshon MLA kaba la long ha u Rymphang-Lber mynta u snem. Dei tang ka VPP kaba dang leit beit sha ki paidbah khamtam sha ki thaiñ nongkyndong ban pynshai ïa la ka nongrim bad ban pynrung dkhot sha ka seng.
Kumba ngi ïohi mynta, dei tang ka VPP kaba don ïa ka bor ban ïakhun pyrshah ïa kiwei pat ki seng saiñpyrthei khamtam kito kiba shong ha ka liang synshar. Ka NPP ruh ka sngewthuh shai ba kam lah ban kheiñ sting ïa U Prah. Namarkata, kan kham jynjar ïa u Bah Prestone ban pynïar bad pynkhlaiñ ïa ka seng khamtam ba ka la jop tang 8 ngut ki MLA na Rilum Khasi Jaiñtia ha ka ilekshon ha u bnai Rymphang-Lber. Sha Rilum Garo, u Bah Prestone un ym don jingeh namar u don u Conrad bad bun ngut ki MLA bad MDC. Ha ka ilekshon MLA kaba la dep, lada ym dei na Rilum Garo, ka NPP kam rat da poi sha ka thong ban ïoh synshar biang sa shisien hadien ki san snem ba ka la don ha ka bor. Hynrei baroh ngin hap ban ïa pdiang haba ka la long ka seng kaba bun paid tam bad kaba la ïoh jingkyrshan sa na kiwei pat ki seng ban thaw ïa ka sorkar Meghalaya Democratic Alliance – II.
Ha kajuh ka por, baroh ki tip ba u Dr Kharlukhi um da dei than u ’riew saiñpyrthei lada ïanujor bad kiwei pat. U la don la ka jong ka rukom treikam. Hynrei mynta, ka NPP ka la ïoh syndon da uwei na ki snar ha ka saiñ hima sima bad uta u dei u Bah Prestone ban ïalam ïa ka seng. Ngin hap ban ïa peit kumno une u rangbah un ïalam hapdeng ka jingbun ki seng saiñpyrthei bad ka jingbym hun jong kiba bun ki paidbah ka Ri Khasi Jaiñtia ïa ka NPP. Nangne shakhmat, lehse ka saiñ hima sima ha Meghalaya khamtam ha Ri Khasi Jaiñtia kan long kaba itynnad namar ka jingïatan tyllai hapdeng ki seng bapher-bapher kiba hap ban ïakhun ban ïoh ïa ka jingshaniah jong ki paidbah. U diengkot banyngkong ban thew ïa ka jingtbit ne jingbym tbit jong u Bah Prestone ban ïalam ïa ka seng kaba la ïoh ïa ka kyrdan ‘National Party’ kan dei ka ilekshon sha ka KHADC bad JHADC. Lada ka poi ka NPP sha ka thong, un ïoh ïa ka jingïaroh kum u nongïalam. Hynrei lada pulom, un sa shah buh jingkylli ha kiba bun khamtam na ka NPP hi. Ka por kan sa batai ïa kiei-kiei baroh, hynrei ngin ïa peit bha ka rukom ïalam jong u Bah Prestone namar kane ka dei ka sien banyngkong ba un bat ïa kane ka kam.
