Aizawl, Naiwieng:
Naba ka jingpynlong ïa ka ilekshon ka la jan ha ka jylla Mizoram kaba la dei ban long ha ka 7 tarik, Naiwieng, u Myntri Rangbah jong ka jylla u Zoramthanga u la don bynta ban lum ïa ka kynhun jong ki nongthoh khubor ha ka Sngi Ba-ar ha kaba u la ïakren sani bha ha kaba ïadei bad ki rukom pyntreikam na ka bynta ka ilekshon, halor ki kam saiñ pyrthei bad kiba bun kiwei pat ki mat kiba ïadei bad ka jylla.
U Myntri Rangbah u la pynpaw shaphang ki jingthmu jong u ha ka ilekshon ban wan. Naba la sah sa tang shi taïew bad sa tang khyndiat sngi na ka bynta ban pynlong ïa ki jingïalang paidbah, u la ong, “Naduh ba ngi la ïaid shakhmat ha ka jingpynkhreh na ka bynta ban pynlong ïa ka ilekshon ha ka 7 tarik, Naiwieng, ka ban sa long ha ka taïew ban wan, bad kaba la sah sa tang 3-4 sngi ban pynlong ïa ki jingïalang paidbah, ka seng ka la pynpaw ba ha kane ka por ka dei ka por ba ngi don ka jingkyrmen ban ngin ïoh thaw sorkar.”
Ha kaba ïadei ba ka jingai jingkren halor ka jingïapher jingmut kaba dang shen hapdeng ka seng Bharatiya Janata Party (BJP) bad ka Mizo National Front (MNF), u Zoramthanga u la pynpaw ïa ki rukom pyntreikam jong ka seng katkum ki nongrim jong ka.
“Ha kaba ïadei bad ka nongrim, na ka bynta U Blei bad ka jylla, ngi dei ki Khristan, 100% na ka 100% naduh u snem 1961,” u la ong. “Ngi ïeng hala ki jong ki nongrim. Ka BJP ka lah ban don la kajong ka nongrim, ngi don la ki jong.”
U Zoramthanga u la pynshai shuh shuh da kaba ong ba ka seng MNF ka ai ka jingkyrshan ïa ka kynhun National Democratic Alliance (NDA) halor ka mat ba ïadei bad kine bad lada ka mat ka long pyrshah ïa ka jingmyntoi jong ki briew ka jylla, kin pyrshah ïa ka.
