Shillong, Naiwieng 01
Ka jingïaid lynti jong ar ngut ki nongïalehkai athletics ka Jylla ka la poi sha kaba kut ha ka 37th National Games hadien ba kim shym lah ban kynjoh sha ka thong ha ka Sngi Balang ha Goa.
Kine ki kynthup ïa u Skhemlang Suba bad ka Glorify Kurbah, kiba long tang ma ki kiba mihkhmat ïa ka Jylla na ka Athletics.
Ha ka jingïakop mareh jong ka 800m (heat) ki shynrang, u Skhemlang na Ri Bhoi District bad uba la shah pyntbit ha ka shlem ai jinghikai jong ka Sports Authority Bhopal, u la wan ba khatar da kaba pyndep ha ki 1:53.31 sekhon.
Kat kum ki kyndon, tang kito ki nongïalehkai kiba wan ha ka thup kaba phra ki ban ïoh rung sha ka final.
Ïa ka kyrdan ba nyngkong la khur da u Pradeep Senthil Kumar na Tamil Nadu ha kaba u la lah ban pyndep ha ki 1:49.26 sekhon, ba-ar u Prakash Gadade (Services) uba la pyndep ha ki 1:49.57, balai u Somnath Chauhan na Haryana ha ki 1:49.90, ba saw u Shakeel (Rajasthan) ha ki 1:50.28, basan u Abhisek Singh Thakur (Services) ha ki 1:50.63, ba hynriew u Harjot Singh (Punjab) ha ki 1:50.86, ba hynñiew u Vishal Bhagu Bhute (Goa) ha ki 2:03.09 bad baphra u Anu Kumar (Uttarakhand) ha ki 1:51.35 sekhon.
Haba phai sha ka 5000m jong ki kynthei, ka Glorify Kurbah ka la wan shadien duh ha kaba kam shym lah ban pyndep ïa ka wat kaba hynriew.
