Washington, Naiwieng:
Katkum ki khubor la ong ba u Secretary of State jong ka United States, u Antony Blinken, un sa leit ban khmih sha Middle East ha kane ka Sngi Thohdieng, hadien ba ka jinglong jingman ha katei ka thaiñ ka la sdang wanrah jingma namar ka jingbyrngem jong ka Iran ïa ka US haba iadei bad ka thma ka Israel pyrshah ïa ki lehnoh Hamas jong ka Palestine.
Kumta, la ong ba u Blinken ha katei ka Sngi Thohdien un leit sha Israel ban leit shong jing-ialang bad ki heh jong ka sorkar Israel bad hadien kata un sa leit ban khmih ïa ki katto-katne ki bynta jong katei ka thaiñ.
La ong ba wat da ki lad pathai khubor ka Israel ruh ki la dep pynbna teng ïa ka jingleit khmih jong u Blinken sha Israel ban iakynduh bad ki heh nongialam ka Israel na ka bynta ka jing-long-jingman ha Middle East.
Namar la ong ruh ba wat ha kine ki por ba dang sdang khie ka thma Israel bad ki Hamas, u Blinken u la leit jurip noh mar-mar sha Israel, kum shi bynta ban pynpaw ïa ka jingkyrshan jong ka United States ïa ka Israel hapdeng ka jingiakhun thma jong ka pyrshah ïa kitei ki lehnoh jong ka ri Palestine.
La ong ba ka jingkhie jong ka thma ka Israel bad ki lehnoh ha Gaza, ka la pynkhih win ïa kiba bun ki ri khamtam ki ri Arab bad kito ki ri kiba ai jingkyrshan ïa ka Israel.
Shuh shuh ruh la ong ba u Blinken u la leit ban synran lem ïa u President ka United States- u Joe Biden, ha ka por ba u Biden u leit ban shong jingialang bad ki heh ka Israel ha ka jingleit khmih ba shi sngi sha Tel Aviv ha ka 18 tarik mynshem bnai.
Kumba la iohi ruh ba ka jingleit hiar thma ba kyndit jong ki lehnoh Hamas ïa ka Israel, ka la shim ïa ka jingim jong palat 1,400 ngut ki paidbah nongshong shnong ka ri Israel, bad kumba 230 tam ruh kiba kham bun ki dei ki nong America, ki la shah rahbor ha ki dkhot jong katei ka kynhun lehnoh Hamas sha Gaza Strip, ha kaba kitei kiba shah rahbor ki dang don hi hapoh ka kti jong ki lehnoh Hamas tat haduh kine ki sngi mynta.
Kumta, la ong ruh ba dei kane ka daw kaba la pynkhie bitar ïa ka Israel bad ka Israel ka la smai ba kan pynhiar kput bad kan pynduh-pyndam syndon ïa katei ka kynhun lehnoh Hamas, kaba long ka jingma kaba khraw ïa ki pateng ki ban wan lada ym lah ban pynduh jait noh syndon ha kane ka sien mynta.
Kumjuh ruh la ong ba ka jingther bom jong ka Israel sha Gaza, ka la shin ïa ka jingim jong palat 8,500 ngut ki paidbah nongshong shnong ka Gaza bad kane ka la wanrah pat ïa ka jingsngew khia na kiba bun ki tnat bad ki nongialam jong ki ri bapher namar ka jingshah thombor ka Gaza, ka la ktah pat ïa ki paidbah bad ki mynsiem ba lui-lui kiba la shu iap duh ha katei ka thma jong ka Israel bad Gaza ha kane ka por.
Dei namar kane ka daw ba ka United States ruh ka la kyntu ïa ka Israel ba wat la ka dang iai bteng ïa ka jingleit hiar thma sha Gaza, hynrei ba kan ailad pat ban pyniaid bad pyntuid ïa ki mar bam bad ki song jing-iarap sha Gaza khnang ba ki paid nongshong shnong ka Gaza kin ioh ban pyndonkam bad kin lait na ka jingïap thngan watla ki la hap ban long kum ki phetwir ki bym don jaka shong neh shuh hynrei katba ki dang ioh ka bam, kan kham iarap ïa ki ban lait na ki jingeh bad ki jingpang jingshitom bapher bapher.
