Gaza, Naiwieng:
Ka kynhun lehnoh Hamas ha ka Sngi Ba-ar ka la byrngem ba kan nym ailad ïa ka Israel bad ba kan pynlong ruh ïa ka Gaza kum ka jaka tep ïa ki shipai ka Israel.
Ki heh ka Hamas ki la pyntip ba ka Hamas kan sa pyllait noh ïa katto katne ki nongwei ki bym dei ki nong Israel ha kine ki khyndiat sngi ki ban wan, hynrei ki la pynbna ruh ba ka Hamas kam treh ban pyndem bad kan pynkut ïa ki shipai ka Israel bad kan pynlong ruh ïa ka Gaza kum ka lum lane ka jaka tep ïa ki shipai ka Israel kiba leit ban hiar thma sha Gaza.
Ki don kumba 240 ngut kiba ka Hamas ka la ioh ban rahbor na Israel naduh kaba sdang jong ka jingleit hiar thma jongka sha ki bynta ka phang South jong ka Israel ha ka 7 tarik u Risaw bad bun ruh na kitei kiba shah rahbor baroh, ka Hamas kam pat shym la pyllait tad haduh kine ki sngi.
Tad haduh ka step Sngi Ba-ar, ka Hamas ka la dep ban pyllait tang ïa ki 5 ngut kiba ka la rahbor ha katei ka por.
Kumta, la ong ba kane ka khubor ka long ha kane ka por ba ka Israel ruh ka la smai ba kan pynhiar kput bad kan pynduh- pyndam syndon ïa baroh ki kam thombor jong katei ka kynhun lehnoh hapoh Israel bad kumjuh ruh ha Gaza.
