Jowai, Naiwieng 01
Ka Demthring bad ka Ladthadlaboh ki la khur jingjop ha ka lympung ïalehkai First Division Football Tournament (Chatister Kharkongor Memorial Trophy) bad Super Division Football Tournament (Kiang Nangbah Memorial Trophy).
Ïa kine lympung la pynïaid da ka West Jaiñtia District Sport Association (WJDSA) ha madan Kiang Nangbah Stadium Ladthadlaboh, Jowai ha ka sngi Balang.
Ha ka jingïakhun jong ka First Division, ka Demthring ka la pynliem noh ïa ka Mookyndur da 4-0 kol. Ïa kine kol la thep da u Babitlang Dkhar ha ka minit kaba 1 bad 5. Ka Demthring ka la ïoh ei shi kol na ka daw ka jingbakla thep hi u rangïalehkai ka Mookyndur u Consider Suting ha ka minit kaba 45 bad ïa kawei pat la thep u Maidong Mukhim ha ka minit kaba 45+1.
Haba phai sha ka Super Division, ka Ladthadlaboh ka la pynliem ia ka Mynthong da 4-1 kol. U Buromlangki Salahe u la khur ia ka hat-trick hadien ba u la ïoh ban thep ha ka minit 2, 65 bad 70 bad ïa kawei pat la thep da u Kindness Mukhim (68). Katba ka Mynthong ka la pynphai shi kol lyngba u Samewan Rymbai ha ka minit kaba 85.
