Khliehriat, Naiwieng 01
Ka Sutnga SSCC bad ka R. Shkenshynriah SC ki la khur ïa ka jingjop ha ka lympung ïalehkai Super Division Football Tour-nament ba la pyniaid da ka East Jaiñtia Hills District Football Association (EJHDFA).
Kane ka la wan hadien ba ka Sutnga SSCC ka la pynliem da 3-1 kol ïa ka R. Ïawpynsing SC. Ka Sutnga SSCC ka la ïoh ban pynkhih jar tang ha ka minit kaba 3 lyngba u Neesta Feeco Bamon, bud sa ka kol ba la thep da u Sumarbha Bareh ha ka minit kaba 11 bad u Ioanis Suchen (90+4). Katba ka Ïawpynsing ka la pynphai ha ka minit kaba 32 lyngba u Sixkiru Lyngdoh.
Haba phai sha kawei pat ka jingïakhun, ka Shkenshynriah SC ka la pynliem da 5-1 kol ïa ka R. Wahshnong SC. U Ribiang Dkhar u la khur ia ka hat-trick na ka bynta ka Shkenshynriah da kaba thep ha ka minit kaba 15, 58 bad 86, u Hikaidame Bareh (69), u Roiboklang Bareh (90+2). Katba ïa ka kol jong ka Wahshnong la thep da u Silas Lyngdoh ha ka minit kaba 81.
Ïa kane ka lympung ialehkai la wan ban plie da u nongsaid aiñ ka District u Bah Shitmon Pdang ha ka jingdonlang ki Waheh Shnong, ki riew rangbah, ki dkhot ka East Jaintia Hills District Football Association bad kiwei .
