Shillong, Naiwieng 01
Ka Shillong Lajong Football Club kaba la wanphai biang ha ka I-League kan pynkhreh ïa ka jingïakhun kaba nyngkong shabar na la ïing pyrshah ïa ka Mohammedan SC ha ka Sngi Thohdieng ha Naihati Bankimanjali Stadium, West Bengal.
Kane ka kynhun hapoh ka jingïalam u Bah Bobby L. Nongbet kum u coach, ka la poi ha West Bengal na ka bynta ban pynkhreh ïa kane ka jingïakhun pyrshah ïa ka Mohammedan, kaba la ïadon bynta lang da u coach barim ka SLFC u Bah Alison Kharsyntiew.
“Ha kaba nyngkong eh nga sngewkmen ban ïohi biang ïa ka Shillong Lajong ha ka I-league namar ka long ka kabu ksiar ïa kiba bun ki rangïalehkai na ka Jylla ba kin ïoh ban ïashim bynta ha ka I-league,” la pynpaw u Alison haba ïakren bad u nongthoh khubor.
“Te kumta nga khmih lynti ba kane ka jingïalehkai kan long kaba itynnad bad nga kyrmen ba ka kynhun jong ngi (Mohammedan SC) kan bteng biang ha kaba ban ïalehkai bha kumba ka lah ban pynliem ïa ka Aizawl FC ha ka jingïakhun kaba nyngkong.”
Hapoh katei ka kynhun kaba na Kolkata, ki la don ar ngut ki rangïalehkai na Meghalaya kata u Denzil Kharshandi bad u Padan Chhetri. Te kumta la khmih lynti ba kin ïoh ban ïashim bynta ha kane ka lympung.
Ha kawei pat ka liang ka Lajong ka don ïa ki rangïalehkai ba kynsai na ka Jylla ba kynthup ïa u Damaitphang Lyngdoh, Allen Camper Lyngdoh Nongbri, Atlan-son Kharmaw, Henryford Neng-nong, Iohborlang Lyngdoh Lyngkhoi, Kenstar Kharshong, Figo Syndai, Kynsaibor Lhuid, Shano Tariang bad kiwei nalor ki rangïalehkai nabar ri.
