Guwahati, Naiwieng:
Na ki 174 ngut ki kyrtong kiba dei ban ïakhun ilekshon na ka bynta ka jingshahjied ha ka kynhun jong ki 40 ngut ki dkhot jong ka Assembly ha Mizoram, ki la don kumba 7 ngut ïa kiba la shah pynshisha ba ki la don ki mukotduma kiba long pyrshah ïa ki, katba 114 ngut ki dei kiba don ïa ka spah kaba palat ïa ka T. 1 klur, la ïathuh ka kaiphot ba la pynpaw ha kine ki khyndiat sngi.
Ïa kane ka kaiphot la pynkhreh da ka Association for Democratic Reforms (ADR) and Mizoram Election Watch ha kaba ka la paw na ka jingkhmih bniah halor ki jingpynshisha jong baroh 174 ngut ki kyrtong, kiba ïakhun ïa ka ilekshon Assembly jong u 2023 ha Mizoram.
Nalor kane ka tyllong khubor ka la ïathuh shuh shuh ba na ki 174 ngut ki kyrtong ba la shah khmih bniah, 67 ngut ki dei na ki seng saiñ pyrthei ba la paw ha ka ri, 40 ngut na ki seng hapoh ka jylla, 40 ngut na ki seng ki bym pat shah ithuh bad 27 ngut ki kyrtong shimet.
Ka kaiphot ka la ong ba ka jingtreikam ka pisa ha ka ilekshon ka la long ka sakhi na ka jingai tiket jong ki seng saiñ pyrthei tang sha ki kyrtong kiba don spah.
