Washington, Naiwieng:
Katba ka thma hapdeng ka Israel bad ki Hamas ka dang iai bteng, ka United States pat la ong ba ka la phah sa kumba 300 ngut ki shipai sha ka thaiñ Central Command jong ka US, ki ban leit pynkhreh bad ban pahara ïa ka jinglong- jingman ha Middle East bad ha ki katto katne ki bynta jong ka Africa.
U Secretary ka Pentagon Press, u General Patrick Ryder u la iathuh ba kitei ki shipai kin long ban iarap ïa kito ki shipai kiba la dep phah ha shwa bad kin leit ban pynbiang ïa ki jingdonkam jong kito kiba la don lypa. La ong ruh ba kine 300 ngut shipai kiba phah thymmai ha kane ka kynti kim dei ki ban phah sha Israel.
Ki bynta jong ka thaiñ Middle East ki ban ioh jingiada na ka Central Command jong ka US ki kynthup ïa 20 tylli ki ri naduh ka Iraq, Iran, Pakistan, Afghanistan, ki ri jong ka Arabian Peninsula bad sha ka phang North jong ka Red Sea bad ki 5 tylli kir jong ka Central Asia.
Ha kajuh ka por ruh u Ryder u la ong ba ka US kan iai bteng ban phah ïa ki jingdonkam bad ki jingkyrshan sha ka Israel katba ka thma ka dang iaid shakhmat.
Shuh shuh ruh u la ong ba ka US ka dang iatrei lang bad ki nong-ialam na Israel haba iadei bad ka jingpyllait ïa kiba shah rahbor ha ki lehnoh Hamas, kynthup ïa kito kiba dei ki nong America kiba la shah rahbor lang ha ki Hamas ha ka por ba ki lehnoh Hamas ki leit ban hiar thma bad ban rahbor ruh ïa ki briew jong ka Israel.
