Shillong, Naiwieng 01
Ka Sports Committee jong ka seng KSU East Jaiñtia Hills District Unit ha ka sngi Balang ka la pynkup burom ïa ka ‘thei ïalehkai ka Rukini Dkhar, kaba la khur ïa ka takma rupa ha ka jingïakop mareh kaba 600m jong ka U- 14 Girls’ ha ka lympung ïalehkai 34 East Zone Champion 2023 kaba la long dangshen ha West Bengal.
Ka seng ka dap da ka jingsngewsarong ïa kane ka heprit halor ka jingtrei shitom jong ka haduh ba kan ïoh wanrah ka burom ïa ka shnong ka thaw, ka District bad ïa ka Jylla hi baroh kawei. Kane ka seng ka la kyrmen skhem ba ha ki sngi ban wan kan danglah ban khur jingjop biang ha kiwei pat ki jingïakop.
Shuh shuh ka KSU ka sngewkmen ban tip ba kane ka heprit ka la shah jied ha ka shlem ai jinghikai jong ka Sports Authority of India (SAI), Shillong.
Ka Seng ka kitbok kitrwiang ïa kane ka heprit ba kan nangkiew arsut ha ka kam ïalehkai bad kumjuh ka kitbok ïa kane ka heprit ba kan leitsuk leit saiñ sha SAI, Shillong bad ba kan trei shitom bha. Kane ka long kat kum ka kyrwoh ba la pyllait da u samla Hamewanpyn-hun Ryngkhlem, Publicity Secretary KSU East Jaiñtia Hills District Unit.
