Shillong, Naiwieng 01
Ka Ïatyllilang SC ka la long sa kawei pat ka kynhun kaba la jam sha ka final ha ka lympung ïalehkai U-20 4th Division Football League 2023 ba la pynïaid da ka Shillong Sports Association hadien ba pynliem noh ïa ka Mawkriah West SC da 1-0 kol ha ka sngi Balang.
Ka jinglah ban pyntikna kane ka kynhun ka la wan urlong lyngba ka shi kol ba la thep da u Melawantei Kharmuti.
Ha kane ka jingïakhun semi final kaba la long ha SSA Stadium, Polo baroh ar kynhun ki la pyrshang ban ïakhun tyngeh naduh kaba sdang. Wat la kine ki kynhun ki la ïoh ïa ki kabu kiba biang, hynrei kim shym la lah ban pynkhih jar.
Hashwa ban kut artad ka jingïalehkai ka Ïatyllilang ka la ïoh ban thep shi kol lyngba u Melawantei ha ka minit kaba 85 na ka bynta ban khur syndon ïa ka jingjop.
Lyngba kane ka jingjop ka Ïatyllilang kan pynkhreh ban ïaknieh ïa ka nam lahduh bad ka Kharang SC, kaba la jop da 1-0 kol ïa ka Lamlynti FC ha ka semi final kaba nyngkong kaba la long ha ka sngi Ba-ar. Na ka liang ka SSA kan sa pynbna ïa ka tarik ban ïakhun ïa ka final.
Kane ka synjuk ïalehkai ka la pynbna ruh ba kan bteng biang ïa ka 2nd Division Football League 2023 ha ka sngi Palei, ha kaba ka Nongrah SC kan ïakhun pyrshah ïa ka Pohkseh SC ha ka por 11:30 mynstep, katba ka Lumshyiap SC ïa ka Imson SC ha ka por 2 baje janmiet.
