Saipung, Naiwieng 02
Ka Narwan SC ka la khur jingjop ha ka lympung ïalehkai Super Division Football League ba la pynïaid da ka Saipung Block Sports Association (SBSA), hadien ba ka la lah ban pynliem noh ïa ka Mynthning da 3-0 kol ha ka sngi Palei ha madan ïalehkai Lamyrsiang.
Ha kane ka jingïakhun, ka Narwan ka la lah ban ïalehkai bha naduh kaba sdang ha kaba u Heimonmi Dkhar u la ïoh ban pynkhih jar nyngkong eh ha ka minit kaba 10. Kane ka kynhun ka la thep biang ïa ka kol kaba ar lyngba u Arhawni Shadap ha ka minit kaba 28 na ka bynta ban tam 2-0 kol ha ka kylla step.
Ka Narwan ka la ïoh biang ban thep ïa ka kol kaba lai ha ka kylla miet lyngba u Brave Shadap ha ka minit kaba 69 na ka bynta ban khur syndon ïa ka jingjop.
Haba phai sha kawei pat ka jingïakhun kaba ar hapdeng ka Jalaphet Bri Sumer SC bad ka Mulait United FC ki la ïakhaid mar 1-1 kol. Ka Jalaphet ka la pynkhih jar nyngkong eh lyngba u Plidar Dkhar ha ka minit kaba 27, hynrei ka Mulait Utd ka la lah ban pynïakhaid kylla lyngba u Jef Surong ha ka minit kaba 39.
Kane ka lympung kan bteng biang ha ka sngi Thohdieng hapdeng ka Lamyrsiang SCC pyrshah ïa ka Latyrke SC ha ka por 11:30 mynstep, katba ka Shnongrim SC ïa ka Tluh SC ha ka por 1:30 mynsngi.
