Egypt, Naiwieng:
Katkum ki khubor la ong ba bun ngut ki nongwei kiba don ha Gaza ki la pynkhreh ban mih noh na Gaza Strip ha ka Sngi Palei hadien ba ka thma Israel bad ki lehnoh Hamas ka la nang jur bad nang shyrkhei. Ka sorkar Hamas kaba synshar ha Gaza ruh ka la pyntip ba 195 ngut ki nong Palestine ki la khlad noh ha ka jingleit hiar thma jong ka Israel ha ki jaka sah jong ki phetwir ha Jabalia bad kaba la wanrah ia ka jingpyrshah na kiba bun haduh ba ka UN Human Rights ruh ka la ong ba katei ka jingleit thombor jong ka Israel ha ki jaka ba shong ki phetwir ka long ka jingpynkheiñ aiñ.
Kitei ki paidbah kiba la mut ban mih noh na Gaza ha ka Sngi Palei ki kynthup ia kito kiba don ia ka ‘Passport’ lane kiba dei nongshong shnong trai jong kiwei pat ki ri kum ka Australia, Austria, Bulgaria, ka Czech Republic, Finland, Indonesia, Italy, Japan, Jordan, ka United Kingdom bad ka United States.
Ki heh ka tnat khappud jong ka Gaza, ki la pyntip ruh ba ia ki khyrdop khappud ka Gaza la sdang plie naduh ka Sngi Palei khnang ba kiba bun ki nongwei bad ki bym dei ki nongshong shnong trai ka Gaza, kin ioh ban mih noh na Gaza. Namarkata, la ong ruh ba kumba 7,500 tam ki nongwei ba nabar ka Gaza kin ioh lad kumba artaiew ba kin mih noh na Gaza khnang ba kin lait na ki jingma jong ka thma ka Israel bad ka Gaza.
Namar kumba la iohi ia ka jinglong jingman jong ka thma ha kane ka por, ka Israel ka la ther bom ia ka Gaza naduh suiñ, duriaw bad wat na ryngkew ruh khnang ban ioh pynduh jait lut noh ia ki dkhot jong katei ka kynhun lehnoh baroh.
Ha katei ka step Sngi Palei, la ïohsngew ruh ia ka jingriew bad ka jingsawa ki ktang suloi bad ki jingbthei kiba jur kiba la pynkhñiuh ruh ia ka thaiñ ba don ka hospital al-Quds kaba long ruh ka thaiñ ba heh paid bha. Ki bor pyniaid ka Israel ki la dep maham lypa ruh ia ki bor pyniaid ka Gaza ba kin pynkynriah noh ia ki nongpang bad ki paidbah na katei ka hospital khnang ban lait na kino- kino ki jingma namar ka United Nations ruh ka la maham ba katei ka jingleh jong ka Israel kam long kaba suk namar kan wanrah jingma ia ki nongpang lada pynkynriah ha ka rukom ka bym biang.
Ka Israel ka la pynbna ruh ba ha ka jingleit hiar thma sha Gaza ha ka Sngi Ba-ar bad Sngi Balang, ka la ioh ban siat iap ia 2 ngut ki heh nongialam jong ka kynhun lehnoh Hamas hapoh Jabalia, kaba long ka jaka ba heh tam ba shong ki phetwir hapoh Gaza.
