Shillong, Naiwieng 02
Ka lympung ïalehkai 2nd Division Football League 2023 ba la pynïaid da ka Shillong Sports Association (SSA) ka la bteng biang ha ka Sngi Palei ha kaba ka Pohkseh SC bad ka Lumshyiap SC ki la ïoh jingjop ha SSA Stadium, Polo.
Ha ka jingïakhun kaba nyngkong, ka Pohkseh ka la pynliem noh ïa ka Nongrah SC da 3-0 kol. Tang mar ïasdang kane ka kynhun ka la pynkhih jar nyngkong lyngba u Freddy Jyrwa ha ka minit kaba 2. Kane ka kynhun ka la pynbud biang ïa ka kol kaba ar sashwa ban kut ka jingïalehkai jong ka kylla step lyngba u Mickyson Tynsong ha ka minit kaba 45.
Watla ka Nongrah ka la pyrshang ban pynphai, hynrei kam shym la lah ban pynurlong bad ha ka minit kaba 77 ka la shah thep biang sa shi kol ha ka Pohkseh lyngba u Rishem Wanniang ha ka minit kaba 77.
Haba phai sha kawei pat ka jingïakhun kaba ar, ka Imson FC SC ka la shah rem noh ha ka Lumshyiap SC da 4-0 kol. U Fairborn Lyngdoh u la ioh ban thep ar kol ha ka minit kab 24 & 32. Hadien shiteng kynta ka Lumshyiap ka la pynbud biang ïa ka kol kaba lai lyngba u Andrew Paswet ha ka minit kaba 36.
Hadien ar minit ba la bteng biang ïa ka jingïakhun jong ka kylla miet, ka Lumshyiap ka la thep biang sa shi kol lyngba u Nickhil Lyngkhoi ha ka minit kaba 47. Watla ki rangïalehkai ka Imson ki la pyrshang ban pynphai, hynrei kim shym la lah ban pynurlong bad ha kaba kut ka la mad ïa ka jingshah rem.
Ka jingïalehkai ha ka sngi Thohdieng kan long hapdeng ka Sohïong SC pyrshah ïa ka Nongkrem FC haka por 11:30 mynstep, katba ka Umphrup SC ïa ka Laitkyrhong SC ha ka por 2 baje noh phai sngi.
