Washington, Naiwieng:
Ka White House ha ka Sngi Balang ka la pyntip ba u President ka United States- u Joe Biden, un sa leit ban kynduh ïa u nongialam ka China- u Xi Jinping ha ka jingialang ha San Francisco ka ban long mynta u Naiwieng na ka bynta ki mat ba kongsan ha kane ka por.
Kane ka jingpynbna ka long ruh hadien ba u Myntri ka tnat kam bar ri jong ka China, u la leit jurip sha Washington kum shi bynta ban pyntikna ïa ka jing shngaiñ jong u Xi Jinping ba un leit sha US ban iakynduh bad u Biden naka bynta ka jingialang Asia- Pacific Economic Cooperation (APEC).
Hynrei, na ka liang jong ka China, la ong ba kam pat pyntikna la u Xi un leit ne em sha katei ka jingiakynduh kumba la dep ban pynbeit.
Hynrei na ka liang ki heh ka US, ki la iathuh ba katei ka jingiakynduh hapdeng u Biden bad u Xi ka long kaba la dep ban pynbeit lypa bad kumta la ngeit skhem ruh ba u Xi un leit poi beit sha US ha katei ka jingialang kumba la dep kular.
La ong ba u Biden bad u Xi kim pat ju iakynduh markhmat naduh ka sien ba ki iakynduh ha Bali ha u Naiwieng jong u snem 2022.
Kumta ruh la ong ba ka jingiadei hapdeng ka United States bad ka China, ka la sdang ban troiñ naduh ba ka China ka la sdang ban pynjur ïa ka jingiatrei lang bad ka Russia.
