Shillong, Naiwieng 02
Ka khlur ïalehkai Wushu ka Jylla, ka Lorenza Songthiang ka la shah rem noh ha ka quarter final jong ka lympung ïalehkai 37th National Games ha ka Sngi Palei ha Goa.
Kane ka ‘thei ïalehkai kaba dei ka khun jong u nongïalam ka Meghalaya Wushu Association u Bah Donny Raphael Rani, ka la shah rem noh ha ka ‘thei ïalehkai kaba na Haryana.
Kat kum ka khubor la ïathuh ba kane ka dei ka jingïakhun kaba nyngkong na ka bynta ka Lorenza, kaba la sdang beit sha ka quarter final jong ka kyrdan ïalehkai 56kg (senior women).
La ïathuh ba ka Lorenza ka la pyrshang ban ïalehkai bha naduh kaba sdang, hynrei kam shym la lah ban kynjoh sha ka thong namar ka jingkhlaiñ bor katei ka nongïalehkai na Haryana. Te kumta ka jingïaid lynti katei ka khlur ïalehkai ka Jylla ka la poi sha kaba kut noh ha Goa.
Kum ban shu pynkynmaw dangshen ha u Jymmang mynta u snem ka Lorenza ka la khur ïa ka takma rnong na ka bynta ka ri India ha ka Pankration World Championship kaba la long ha Tashkent, Uzbekistan.
