Shillong, Naiwieng 02
Ka kynhun ki rangïalehkai phutbol ka Jylla ka la mad biang ïa ka jingshah rem sa ha ka Maharashtra da 2-1 kol ha ka lympung ïalehkai 37th National Games kaba la long ha ka sngi Palei ha Fatorda, Goa.
Kane ka jingshah rem ka la long ka jingkhanglad shi syndon ïa kane ka kynhun ban jam sha ka semi final na ka Group-B namar tang ar tylli ki kynhun ki ban ïoh rung na kawei pa kawei ka group.
Ha ka jingshisha kane ka kynhun ka la don jingkyrmen ba kan ïalehkai bha namar kiba bun na ki rangïalehkai ki dei kiba la ïadon bynta bad ka kynhun kaba la wan ba-ar ha ka Santosh Trophy mynta u snem bad kaba la shimti biang da u Bah Khlaiñ Pyrkhat Syiemlieh kum u coach, hynrei kane kam shym la urlong satia bad ha ka jingïalehkai kaba nyngkong ka la shah rem ha ka Manipur da 2-1 kol.
Haba phai sha kane ka jingïalehkai ha kane ka sngi, ki rangïalehkai ka Maharashtra ki la lah ban ïalehkai bha naduh kaba sdang, hynrei ka Megha-laya ka la hap ban shu ïashan tyngeh ban pyllait na ka jingshah thep.
Kane ka jingïai pyrshang ban ïakhun tyngeh naduh kaba sdang ka la pynlong ïa ka Maharash -tra ban ïoh pynkhihjar nyng -kong lyngba u Mandeep Singh, uba la lah ban pynpra ïa ki rangïalehkai ‘dien ka Meghalaya lem bad u rangapkol ha ka minit kaba 13.
Hadien shiteng kynta ka Maharashtra ka la pynbud biang ïa ka kol kaba ar lyngba u Advait Shinde ha ka minit kaba 35 na ka bynta ban tam da 2-0 kol haduh kaba kut jong ka kylla step.
Hadien ba la bteng ïa ka jingïakhun jong ka kylla miet, ka Meghalaya ka la wanphai da ka jingkhlaiñ bor ha kaba ka la lah ban pynphai kylla shi kol lyngba u Donlad Diengdoh ha ka minit kaba 60. Kane ka shi kol ka la pynïoh mynsiem ïa kane ka kynhun ban ïakhun tyngeh, hynrei kam shym la lah shuh ban pynphai bad ka la mad ïa ka jingshah rem.
Lyngba kane jingshah rem kaba ar, ka Meghalaya ka dangsah sa kawei ka jingïakhun pyrshah ïa ka Kerala ha ka 4 tarik hashwa ban kan wanphai noh sha la ïing.
