Shillong, Naiwieng 02
Ka jingïalehkai bha u Mohammed Shami ban khur 5 wiket ka la pynlong ïa ka India ban pynliem noh ïa ka Sri Lanka da 302 run na ka bynta ban long ka kynhun kaba nyngkong ban jam sha ka semi-final ha ka Cricket World Cup 2023 ha ka Sngi Palei ha Wankhede Stadium kaba ha Mumbai.
Haba shimti ban tied nyngkong, ka India ka la buh ïa ka thong da kaba kamai 357 run bad shah pynkhyllem 8 wiket ha ki 50 over. Kane ka la wan lyngba ka jingïalehkai bha ki nongtied kiba kynsai kum u Shubman Gill (92), Virat Kohli (88) bad u Shreyas Iyer (82).
Ha kane ka jingïakhun kaba hynñiew, u Gill u la long u nongtied uba la ïoh bun eh da kaba kamai 92 run na ki 92 bol kiba kynthup ïa 11 tylli ki ‘four’ bad 2 tylli ki ‘six’. U Virat Kohli u la ïoh ban khyrwit 88 run na ki 94 bol (11x4s) bad u Sheyas Lyer u la ïoh 82 run na ki 56 bol (3x4s & 6x6s).
Haba wan shimti ïa ka pali ban kawang bol, ki rangïalehkai ka India ki la lah ban ïalehkai bha naba ki nongtied ka Sri Lanka ki la shem jingeh ban kamai ruh bad ki la shah pynkhyllem iwei hadien iwei bad ban kamai tang 55 run ha ki 19.4 over.
Nalor u Mohammed Shami, u Mohammed Siraj u la khur 3 wiket, katba ïa ki shi wiket la noh synñiang da u Jasprit Bumrah bad u Ravindra Jadeja.
Kane ka long ka jingjop kaba hynñiew sien lynter bad ban pynlong shi syndon ïa ka India ban knieh noh ïa ka kyrdan ba nyngkong ba la bat da ka South Africa.
Ha kawei pat ka liang u Virat Kohli u la lah ban khur sa kawei pat ka rekod ha ka jingïalehkai one-day international, hadien ba u la lah ban pyndep ïa ka jingkamai 1000 run mynta u snem ha ka World Cup.
Kane ka long ka sien kaba phra jong u Kohli ban kynjoh ïa u mawjam da kaba kamai 1000 run man la u snem na ka bynta ban pynpra ïa ka rekod ba la bat da u khlur ïalehkai barim ka ri u Sachin Tendulkar, uba la lah ban khur ïa ka rekod kaba hynñiew ha ka kam ïalehkai jong u.
U Kohli u la lah ban kynjoh ia une u mawjam ban kamai 1,000 run ha u snem 2011, 2012, 2013, 2014, 2017, 2018 bad 2019. Katba u Tendulkar u la lah ban pynurlong ïa utei u mawjam ha u snem 1994, 1996, 1997, 1998, 2000, 2003 bad 2007.
U Tendulkar u dangïai bat ïa ka rekod ha ka jingkamai run da kaba u la lah ban tied kamai 1894 run ha u snem 1998.
