Las Vegas, Naiwieng:
Uwei u briew bym lah ithuh u la leit ban tuh ia ka kali pulit bad u la pynmynsaw ruh ia uwei u heh pulit ha shwa ba un tuh ia katei ka kali bad leit tynrah pat ia kawei ka kali ha ka Sngi Ba-ar.
Kane ka la jia ha ka por kumba 11 baje jong ka miet Sngi Ba-ar, ha kaba ka tnat Metropolitan Police jong ka Las Vegas ka la ioh ia ka khubor halor ka jingshah thombor jong utei u heh pulit ha uwei u briew uba iaid lyng-khuit hajan ka Blue Diamond Road bad Buffalo Drive.
La ong ba ha kaba sdang, utei u heh pulit uba iakynduh markhmat bad utei u briew, ki la iakhun mar pyrshah hynrei utei u briew u la ioh ban tied bad khynñiat ia utei u heh pulit bad u la ioh ban rung ruh shapoh ka kali ba utei u pulit u dei ban iaid pahara ha katei ka jaka bad hadien kata u la phet bak na katei ka jaka da katei ka kali. Hynrei tang hadien kumta namar ka jing pynher stet ia ka kali, utei u briew u la leit rat pat sa ia kawei ka kali ha ki surok jong katei ka nongbah.
La ong ba baroh 2 ngut kiba shong ha katei ka kali SUV kaba shah tynrah ha katei ka kali pulit ha katei ka miet, ki la mynsaw jur bad hadien katei ka jingjia la pynkit noh ia ki sha ka University Medical Center naka bynta ki jingsumar ba bniah bad ba kyrkieh.
Hadien kata, ki pulit ki la ioh ban pynithuh ia utei u runar uba iaid lyng-khuit bad la iathuh ia u kum u Clyde Cabulisan, uba la don 29 snem ka rta bad la ong ba une u runar ruh u la don ia katto- katne ki jingmynsaw ha ka met jong u namar katei ka jing iatyngkhuh bad katei kawei pat ka kali ha katei ka miet. Ki pulit ki la rah noh ia u ruh sha ka jaka sumar ban ioh sumar bad pynkoit ia u shuwa ban rah bad pyndep ia ka jingtohkit.
Ia u Cabulisan la pynngat hapoh ki kyndon pynkheiñ aiñ jong ka jingwanrah jingma ia ka jingim kiwei, ka jing bym kohnguh ia ki pulit bad ka jingtuh ne jing pyndonkam bakla ia ka kali pulit.
