Washington, Naiwieng:
Ki bor pyniaid ka US, ki la iathuh ba u P. Varun Raj, 24 snem, uba dei u nong India bad pule ha United States bad uba la shah pynmynsaw ha ka jaka kilan met hapoh Indiana ha ka taiew ba la dep, ha kane ka por u dang don hi hapdeng ka jingsumar bad la ong ba ki doktor ki la iathuh ba kim i don jingkyrmen shuh ia u ba un nang im namar wat haduh mynta ruh u la shu im da ka jingiarap ki kor-ki bor jong kane ka juk ba la pyndonkam da ki jaka sumar hynrei ban ong na ka bor lade um lah shuh ban ring mynsiem ne ban dang im.
U P. Varun Raj, u dei u khynnah pule jong ka laiñ Computer Science, u la shah dung tari ha uwei u runar uba la ithuh kum u Jordan Andrade, 24 snem ka rta, hapoh ka jaka kilan met ‘Gym’ ha ka step jong ka Sngi U Blei hynrei ki pulit ki dang pyniaid ia ka jingtohkit ban lap ia ka daw jong katei ka jingthom bor jong utei u runar pyrshah ia utei u samla.
Kumta, la ong ba wat hadien 3 sngi ba la pynthiah ia u hapoh ka jaka sumar, u Varun u la shu im da ka jingiarap jong ki tiar pynim, hynrei da ka bor lade um lah shuh ban dang im. La ong ba ha katei ka jingjia, u Varun u la shah dung na ki bynta jong ka moi-moi bad kumta wat lada un dang im ruh hynrei un don ia ki jingduna kiba pher bad u lah ruh ban duh noh ia ka bor iohi na ka khmat ka diang kaba dei sha ka liang ba u shah dung tari.
