Shillong, Naiwieng 03
Ka Nongkrem FC ka la khur ïa ka jingjop kaba nyngkong ha ka lympung ïalehkai 2nd Division Football League 2023 ba la pynïaid da ka Shillong Sports Association (SSA) hadien ba lah ban pynliem noh ïa ka Sohïong SC da 2-0 kol ha ka Sngi Thohdieng.
Kane ka nam jop ka la wan urlong lyngba u Pynshai Kharsyntiew bad u Banmanbah Mawïong na ka bynta ban pynlong ïa kane ka kynhun ban khur lai dor-thong kiba nyngkong ha ka Group-A.
Ha kane ka jingïakhun kaba la long ha SSA Stadium, Polo baroh ar kynhun ki la pyrshang ban ïakhun tyngeh naduh kaba sdang, hynrei kim shym la lah ban thep kol. Dei hadien shiteng kynta ba ka Nongkrem ka la ïoh ban pynkhih jar nyngkong eh lyngba u Pynshai ha ka minit kaba 38. Kane ka shi kol ka la nangpynïoh mynsiem ïa kane ka kynhun ban ïai bteng ha ka ban ïakhun tyngeh shuh shuh bad hashwa ban kut ka jingïalehkai jong ka kylla step ka la pynbud biang ia ka kol kaba ar lyngba u Banmanbah ha ka minit kaba 45 na ka bynta ban tam 2-0 kol.
Wat la kine ki kynhun ki la ïai bteng ban ïakhun tyngeh ha ka kylla miet, hynrei kim shym la lah shuh ban thep kol haduh kaba kut ka jingïalehkai bad ka Nongkrem ka la khur syndon ïa ka jingjop.
Haba phai sha kawei pat ka jingïakhun jong ka Group-B hapdeng ka Umphrup SC bad ka Laitkyrhong SC ki la ïasam mar shi dor-thong hadien ba kim shym lah ban thep kol haduh kaba kut ka jingïalehkai.
