U Nongsaiñ Hima, 1965
Kane ka long ka jingkylli ïa u khun ka Ri mynta ki por. Kynmaw para ri ba ka lawei ka ri ka shong ha nga bad ha phi, hynrei ym ha kiwei pat. Ka jingïaid shaphrang ha ka jingnang – jingstad mynta ka juk, ka pynpaw ïa ki dak – ki shin ba ka lawei ka Ri kan long kaba dum, bad lehse kan kot shaduh u pud uba ka jaidbynriew hi kan shu jah rngai noh da ka jingtyllep jong ki bor ba bun jaid na shabar.
Ka jingstad ka la roi, bad ka jingpadiah thylliej tang ha la rympei ruh ka long kaba pnah bad bun bha.Ngi hun ban pun ïa baroh ki jingsniew bad jingtroin kiba ker sawdong ïa ka jaidbynriew bad ïa la ka Ri khlem da nud satia ban kha madan da ka ktien ne ka kam, bad kane hi ka long ka tynrai ba kongsan eh ba ka Ri bad ka jaidbynriew jong ngi ka nanghiar arsut ha baroh ki liang bad ki phang.
Peit ïa kine ki mat bad ki pung harum, bad pyrshang ban pyrkhat – duriap shano ki kdew.
Ka Rep Ka Riang : Ka ri Khasi Jaintia ka long ka ri kaba sei soh shibun, bad la ju khot ruh ka Ri u Soh u Pai. Ka ri hi haduh mynta ka dang lah ban pynmih ïa la u khaw u kba lem bad kiwei ki jingthung wat lada ym lah ban pyndap pynbiang lut ïa u khun u raiot baroh na ki bynta ki daw kiba ngi kheiñ sting bad bym don jingphikir bha.
Ki don kyrhai byrhai ki jaka puta kiba shu iehnoh bad sah shrah kiba ngi lah ban bet ïa u symbai da ka jingïarap ki kor ki bor, bad ki buit stad jong kane ka jaka ki ban wan rah ia ka im pahuh – pahai. Kumjuh ruh la donkam ban ai jinghikai kaba paka bad jingïarap ïa la ki para nongrep ban trei ban seng da ki lad bad ki lynti kiba ïadei bad ka por mynta khnang ban pynmih kyrhai ka bam ka dih. Lada ngi la lah ban leh ïa kane, te ka nam ka ri u soh u pai kan ïaineh junom. Peit para ri aiu ba ki Nongmihkhmat jong ngi ne ka District Council la leh ha kane ka liang. Shano ka Ri kan poi ?
Ki Khlaw Ki Btap : Ki Lum bad ki Khlaw ki la syllen da ka jingpynkyllon than ïa ki dieng ki siej. Kane hi ka ai ym tang ia ka dur kaba sngewsih ïa ngi u Nongpeit, hynrei ka ïarap ruh ia ka Mariang ban thaw ïa ki lad pynjot pynsniew kiba bun. Hangno pat ka spah ka Ri bad kumno kan pynkha pat ïa ka ? Ka spah khlaw ka ri la kjit lut da ki mynder ha ki bun rukom namar ka jingieit sbai rupa jong kiba bat ïa ka bor khlaw. Ha kane ka liang ngi iohi ba kam slem shuh ba ngin hap liat ha ki jingjynjar treh kiba bun hadien habud.
