New Delhi, Naiwieng:
Katkum ki khubor, la ong ba ki shipai ka Israel ki la leit ker-kut ia ka Gaza baroh kawei, ha kaba ka kynhun lehnoh Hamas pat kam shym la pyndem tang khyndiat ruh bad ka la byrngem pynban ba kan sa pynphai biang ia kitei ki shipai hapoh ki song byrni namar ka jingleit ai doh jongki da lade sha Gaza.
La ong ba ki shipai ka Israel ki la lah ban ker-kut noh syndon ia ka Gaza ha ka Sngi Thodhieng, ka Gaza kaba long ka nongbah ba la synshar hi da ki lehnoh Hamas bad kumta ruh la ong ba wat haduh jong ka step Sngi Thohdieng, la ithuh ba kan ym don ka jingsangeh iasiat ne ka jingia pyndem la ka long na ka liang jong ka Hamas bad ka Israel ruh kam treh ban pyllait ia kitei ki lehnoh namar kumba ka la dep smai bad kular ba kan pynduh jait noh syndon ia katei ka kynhun lehnoh Hamas ha kane ka kynti.
Kumjuh ruh ha katei ka Sngi Thohdieng, la ong ba u Secretary of State jong ka US- u Antony Blinken, u la leit jurip sha Israel ban leit iakynduh ia ki nongialam ka Israel bad ban iakren ruh halor ki mat ba kongsan khamtam haba iadei bad ka jingdonkam ban leh adkar bad ban nym pynmynsaw ne ban ktah ia ki paidbah nongshong shnong ka Gaza watla ka thma ka dang iai neh mynta la shi bnai duna.
Ha kajuh ruh ka por la ong ba katba ka thma jong ka Israel pyrshah ia ka Gaza ka dang iai bteng, da ki spah ngut ruh ki nongwei kiba la mynsaw ha Gaza, ki la phet noh na katei ka nongbah Gaza lyngba ka thaiñ khappud na Rafah ban leit rung pat sha Egypt tang ban lait na ka jingma kaba ap ia ka jingim jongki ha Gaza.
La ong ba ki shipai ka Israel ruh ki dang ialeh ban ioh pyllait noh ia kumba 240 ngut kiba la shah rahbor ha ki lehnoh Hamas naduh kaba sdang jong ka thma.
