Shillong, Naiwieng 03
Ka Shillong Lajong FC ka la ïasam mar shi dor-thong (point) ha ka jingïakhun kaba nyng-kong pyrshah ïa ka Mohammedan Sporting ha ka lympung ïalehkai I-League hadien ba ki la ïakhaid mar 1-1 kol ha ka Sngi Thohdieng ha Nai-hati, West Bengal.
Ha kane ka jingïa-lehkai shabar na la ïing ka Lajong hapoh ka jing-ïalam u Bah Bobby L. Nongbet ka la lah ban ïalehkai bha naduh kaba sdang. Wat la ka Moham-medan ka la lah ban pynliem ïa ka Aizawl FC da 2-1 kol, hynrei ha kane ka jingïakhun ka la shem jingeh ban ïoh thep kol na ka daw ka jingïashan tyngeh ki rangïalehkai ‘dien ka Lajong.
Hashwa ban kut ka jingïalehkai jong ka kylla step, ka Lajong ka la ïoh ban pynkhih jar nyngkong eh lyngba u rangïalehkai shakhmat na Japan u Takuto Miki ha ka minit kaba 45+1.
Hynrei hadien katto katne por ba la bteng ïa ka jingïakhun jong ka kylla miet, ka Mohammedan ka la lah ban pynphai kylla lyngba u David Hmar ha ka minit kaba 53 na ka bynta ban ïakhaid mar shi kol.
Lyngba kane ka jing-ïakhaid ka la pynlong ïa baroh ar kynhun ban ïai bteng ïakhun tyngeh shuh shuh, hynrei haduh kaba kut ka jingïalehkai kim shym la lah shuh ban thep kol bad ki la mad ïa ka jingïakhaid.
Kumta ka Lajong kan wanphai sha la ïing na ka bynta ban pynkhreh ïa ka jingïalehkai kaba nyngkong ha la ïing pyrshah ïa ka NEROCA na Manipur ha ka 9 tarik ha SSA Stadium, Polo.
